Многу луѓе кои развиваат дијабетес тип 2 не знаат дека се болни се додека тестот на крвта не покаже покачено ниво на шеќер во крвта или додека болеста не напредува толку многу што почнуваат да се појавуваат сериозни компликации.
„Дијабетесот е тивок и подмолен. Во повеќето случаи, луѓето немаат рани симптоми“, вели Роналд Тамлер, директор на Клиничкиот институт за дијабетес „Mount Sinai“.
Во некои случаи, постојат подмолни знаци. Некои од раните симптоми на дијабетес се добро познати: постојана жед, прекумерно мокрење или нагло зголемување или губење на тежината, додека другите е лесно да се игнорираат, а не би требало.
Воспалени или инфицирани непца
Пародонтот, познат и како болест на непцата, може да биде ран знак за дијабетес тип 2, според новата студија објавена во списанието „BMJ Open Diabetes Research & Care“.
Студијата покажала дека луѓето со заболување на непцата, особено оние со тешки случаи, имаат повисока стапка на дијабетес, дијагностициран и недијагностициран, како и преддијабетес.
Врската помеѓу болестите на непцата и дијабетесот не е нова, вели д-р Тамлер.
„Воспалението предизвикано од заболување на непцата се заснова на истите фактори кои се одговорни за висок шеќер во крвта и предизвикуваат дијабетес“, вели докторот.
Дијабетесот е тивок и подмолен. Во повеќето случаи, луѓето немаат рани симптоми“, вели Роналд Тамлер, директор на Клиничкиот институт за дијабетес „Mount Sinai“
Промена на бојата на кожата
„Пред да добиете дијабетес, може да забележите темна промена на бојата на задната страна на вратот“, вели д-р Тамлер.
Обично тоа е знак за инсулинска резистенција, губење на чувствителноста на хормонот кој телото го користи за регулирање на гликозата, што на крајот може да доведе до потполн дијабетес.
Промените на бојата на кожата во ретки случаи може да бидат предизвикани од цисти на јајниците, хормонални нарушувања, нарушувања на тироидната жлезда и рак. Може да бидат виновни и одредени лекови и суплементи, вклучително и апчиња за контрацепција и кортикостероиди.
Чудно чувство во нозете
Околу 10 до 20 проценти од луѓето на кои им е дијагностициран дијабетес веќе имаат одредено оштетување на нервите поврзани со болеста. Во раните фази, ова едвај може да се забележи. На пример, објаснува д-р Тамлер, може да почувствувате пецкање во нозете.
Губење на слухот или видот
Зголеменото ниво на шеќер во крвта може да ја оштети мрежницата и да предизвика флуктуирање на нивото на течност околу очното јаболко, што резултира со заматен или ослабен вид. Кога нивото на шеќер во крвта се нормализира, видот обично се враќа, но ако дијабетесот не се лекува предолго, оштетувањето може да стане трајно.
Исто така, високиот шеќер во крвта може да влијае на нервните клетки во увото и да предизвика оштетување на слухот.
„Тоа е нешто за што малку луѓе зборуваат, но искусните аудиолози знаат да пронајдат врска“, вели д-р Тамлер.
Долги дремки
Во научен преглед презентиран минатата година, луѓето кои дремеле повеќе од еден час дневно имале 45 отсто поголеми шанси да имаат дијабетес тип 2 во споредба со оние кои спиеле помалку или воопшто не спиеле.
Дремењето во текот на денот всушност не предизвикува директно дијабетес, велат авторите на студијата. Но, тие истакнуваат дека ова може да биде предупредувачки знак за основен проблем како што е недостаток на сон, депресија или апнеја, односно сите состојби поврзани со зголемен ризик од дијабетес.
