ПИШУВА:
Катерина Шекеровска-Димовска
katerina@pedijatar.mk
„Сестринството е професија којашто не може да се работи без љубов, доколку нема емпатија и професионалност тогаш дефинитивно би требало да промениме професија… Не џабе се рекло ако спасиш еден живот си херој, но ако спасиш повеќе животи си медицинска сестра“, вели во почетокот на нашето интервју Андреја Србиновски, дипломиран медицински техничар и одговорен на Одделот за полуинтензивна нега и амбулантни возила во клиничката болница „Жан Митрев“, а од неодамна и носител на признанието за најхумана медицинска сестра-техничар од „Жан Митрев Клиник“ за изминатата 2023 година. „Среќен сум што пациентите се задоволни од мојата нега и услуга, а уште посреќен што моите колеги и колешки го препознаа тоа. Наградата за најхумана сестра ја прифатив со огромна одговорност и надеж дека ќе ја оправдам истата и дека ќе бидам пример за помладите колеги дека со труд, напорна работа и вложеност се доаѓа до посакуваниот успех“, додава Србиновски.
Во неделата на сестринската професија, која претходеше на Меѓународниот ден на медицинските сестри 12 мај, се одржа свечена академија во организација на Унијата на здруженија предводена од Здружението на медицински сестри, техничари, акушерки и стоматолошки сестри „ЗА НАС“, каде што беа доделени признанија за најхумани медицински сестри-техничари избрани од институциите во кои работат. Признанието за најхумана медицинска сестра-техничар од „Жан Митрев Клиник“ за изминатата 2023 година и даден особен придонес кон сестринската професија во нашата земја заврши во Вашите раце. Што всушност значи ова признание за Вас, како го доживеавте и дали е стимул за понатамошна успешна работа?
Србиновски: Со оглед на тоа во какво време живееме, многу често потребно е работните обврски да ги ставиме како приоритет ако сакаме да успееме во професијата. Среќен сум што пациентите се задоволни од мојата нега и услуга, а уште посреќен што моите колеги и колешки го препознаа тоа. Наградата за најхумана сестра ја прифатив со огромна одговорност и надеж дека ќе ја оправдам истата и дека ќе бидам пример за помладите колеги дека со труд, напорна работа и вложеност се доаѓа до посакуваниот успех.
Хуманоста на медицинските сестри е основен столб на нивната професија, овозможувајќи им да обезбедат целосна и холистичка грижа за пациентите, која ги надминува физичките аспекти на здравствената грижа и се фокусира на целокупната добросостојба на поединецот. Дали Вие ја бирате професијата или таа Ве бира Вас? Што треба да поседува една медицинска сестра?
Србиновски: Сестринството е професија којашто не може да се работи без љубов, доколку нема и професионалност тогаш дефинитивно би требало да промениме професија… Не џабе се рекло ако спасиш еден живот си херој, но ако спасиш повеќе животи си медицинска сестра. Медицинската сестра во секојдневната нега и грижа на пациентот е дел од мултидисциплинарниот тим кој се грижи за пациентот. Нејзините квалитети како доверливост, емпатија, професионалност, грижливост се само дел од критериумите за успешна медицинска сестра.
Вие сте дипломиран медицински техничар, одговорен на Одделот за полуинтензивна нега и амбулантни возила во клиничката болница „Жан Митрев“. Што е она што Ве води секојдневно во работата и како се справувате со стресните и предизвикувачки ситуации?
Србиновски: Самата професија подразбира справување со стресни ситуации, секој ден е нов предизвик, така што уште за време на образовниот процес ние стануваме свесни кои се ситуации може да произлезат при работа со пациенти со нарушено здравје и нивните семејства.
Што беше пресудно да ја одберете оваа професија во годините кога одлучувавте каде ќе го продолжите своето образование?
Србиновски: Како и секој млад човек не бев сигурен во својот избор, но ја имав таа среќа мојот кариерен развој да го почнам во клиниката „Жан Митрев“, со поддршка и насока на мојот ментор. Амбициозноста и трудољубивоста се високоценети карактерни особини во оваа клиника и со текот на годините само си потврдив себеси дека ја избрав вистинската професија.
Се чувствувате ли „привилегирани“ на терен на кој доминираат жените?
Србиновски: Стереотипизацијата на нашата професија како женска професија е веќе минато. Огромен е бројот на мажи кои се вклучени во работниот процес како дел од оваа професија. Но, да одговорам на вашето прашање, ДА – се чувствувам привилегиран да работам во средина во која доминираат жените.
Медицинските сестри се високобарани професионалци во здравствениот сектор ширум светот. Се повеќе сестри заминуваат од земјава, барајќи подобри услови за работа и живот. Што е она што Вас ве држи овде?
Србиновски: Психичкиот мир е категорија којашто не се купува или продава за пари. Извонредните услови за работа во кои работам како и професионалниот тим со кој секојдневно соработувам се фактори кои сами по себе не ми дозволуваат да помислам на напуштање на државата. Јас сум почитувач на правилото: „Тимот што победува не се менува“.
Што би им порачале на Вашите идни колеги кои размислуваат да го одберат смерот МС?
Србиновски: Доколку можат да почуствуваат сатисфакцијата од секојдневнaта грижа за пациентите и нивните семејства и доколку и покрај физичкиот напор, смената би ја завршиле со насмевка и чиста совест дека го дале својот максимум за пациентите, тогаш ова е дефинитивно професија за нив. Еве ја користам оваа можност и отворено ги поканувам да дојдат да не посетат и да ја почуствуваат позитивната енергија во професијата.
