ПИШУВА:
Катерина Шекеровска-Димовска
katerina@pedijatar.mk
Четвртиот бран на пандемијата, кој се должи пред се, на делта сојот на коронавирусот, не ги поштеди ниту децата, што резултира со зголемување на бројката на хоспитализирани педијатриски пациенти. За тоа како се манифестира болеста Ковид-19 кај децата, кои се симптомите, но и кога родителите треба да побараат лекарска помош разговаравме со асс. д-р Ивана Арнаудова-Даневска, специјалист педијатар, Институт за белодробни заболувања кај децата – Козле, Скопје. „Најчести симптоми кај децата со Ковид-19 се покачена температура и кашлица. Болеста се манифестира со симптоми кои наликуваат на настинка (,,flu-like symptoms”) односно со носна секреција, болка во грло, главоболка, слабост/малаксаност, но и гастроинтестинални манифестации (намален апетит, повраќање, стомачна болка и дијареја)“, објаснува асс. д-р Арнаудова-Даневска.
Колку деца со Ковид-19 во моментов се хоспитализирани во Ковид центарот во склоп на ЈЗУ Институт за белодробни заболувања кај децата – Козле и која е нивната возраст? Зголемена ли е бројката на педијатриски пациенти во овој четврти бран на пандемијата?
Под лекарски надзор треба да се доенчињата и децата со комплексни генетски, невролошки и метаболни заболувања или со вродена срцева мана. Слично како кај возрасните, децата со прекумерна телесна тежина, дијабетес, астма или други хронични белодробни заболувања, српеста анемија или оние под имуносупресивна терапија може да бидат под зголемен ризик за тешка форма на Ковид-19
Асс. д-р Арнаудова-Даневска: Бројката на педијатриски пациенти во четвртиот бран на пандемијата е зголемена и во моментов во Ковид центарот при Институтот за белодробни заболувања кај децата се хоспитализирани околу 20 деца. Секако голем е бројот и на Ковид-19 позитивни деца кои амбулантски се прегледуваат и следат во нашата установа. Воглавно се работи за доенчиња и помали деца до 2 годишна возраст како и адолесценти.
Кои се најчестите симптоми на Ковид-19 кај децата?
Асс. д-р Арнаудова-Даневска: Најчести симптоми кај децата со Ковид-19 се покачена температура и кашлица. Болеста се манифестира со симптоми кои наликуваат на настинка (,,flu-like symptoms”) односно со носна секреција, болка во грло, главоболка, слабост/малаксаност, но и гастроинтестинални манифестации (намален апетит, повраќање, стомачна болка и дијареја).
Генерално децата имаат полесен облик на болеста. Тежок облик на болеста и смртност во светски рамки е почест кај деца со тешки хронични заболувања.
Бидејќи оваа година, наставата во сите училиштата и за сите ученици ќе се изведува со физичко присуство ризикот за трансмисија е поголем во споредба со лани, но доколку максимално се почитуваат протоколите за заштита, појавата на болеста ќе се сведе на минимум
Кога родителите треба да побараат лекарска помош?
Асс. д-р Арнаудова-Даневска: Родителите треба да побараат лекарска помош кога ќе забележат влошување на општата состојба, одбивање на внес на храна и течности и доколку симптомите продолжуваат и траат повеќе денови и покрај дадената супортивна терапија со течности и антипиретици.
Секако под лекарски надзор треба да се доенчињата и децата со комплексни генетски, невролошки и метаболни заболувања или со вродена срцева мана. Слично како кај возрасните, децата со прекумерна телесна тежина, дијабетес, астма или други хронични белодробни заболувања, српеста анемија или оние под имуносупресивна терапија може да бидат под зголемен ризик за тешка форма на Ковид-19.
Со стартот на новата учебна година и отворањето на училиштата со физичко присуство, растат стравувањата од трансмисија во училишните клупи и зголемување на бројот на педијатриски пациенти заразени со SARS-CoV-2. Делта сојот не штеди никого, па ни децата, очекувате ли пораст на бројот на деца со Ковид-19 во наредниот период?
Асс. д-р Арнаудова-Даневска: Земајќи го предвид искуството од минатата учебна година кога имаше мал број на заболени деца од оние кои посетувале училиште со физичко присуство се надеваме дека нема да има голем пораст на бројот на заболени деца. Бидејќи оваа година, наставата во сите училиштата и за сите ученици ќе се изведува со физичко присуство ризикот за трансмисија е поголем во споредба со лани, но доколку максимално се почитуваат протоколите за заштита, појавата на болеста ќе се сведе на минимум.
