Пубертетот се смета за една од најчувствителни фази од растењето на децата. Се менува нивниот однос кон родителите, кон околината, кон сопственото тело и секако и кон исхраната. Но, лекарите сметаат дека токму во овој период здравата исхрана е клучна за целиот организам.
Девојчињата и момчињата денес се опкружени со реклами, на кои “совршено“ градени манекени рекламираат илјадници постоечки производи, каде воопшто не се споменува колку е важна здравата исхрана за време на пубертетот, кога со бурните хормонални реакции доаѓа до нагло развивање на телото и уште понагли психолошки промени.
Во желбата да изгледаат еднакво толку добро како своите идоли, децата паѓаат под влијание на разни диети и рецепти за постигнување на она што мислат дека е нивна идеална телесна тежина. Повеќето од нив ги мачи прекумерната телесна тежина, но има и такви кои имаат проблеми со недоволно килограми за возраста.
Исхраната на дете во пубертет е голем предизвик за родителите. Додека детето е мало и повеќе време минува дома, многу е полесно да му се спроведе здрава исхрана. Но во овој период, кога поголемиот број од децата го минуваат надвор, со училишни и вонучилишни активности, многу е потешко да се контролира што јадат. Повеќето деца и одбиваат да носат спакувана ужина од дома, туку сакаат да носат пари и сами да си купат, па нивниот избор се сведува на брза храна, пецива, пици, тостови. Со тоа секако одат и газирани пијалаци и слатки.
СОВЕТИ ЗА ПРАВИЛНА ИСХРАНА
- Вклучете го детето во изборот и делумно во подготовката на оброците.
- Едуцирајте ги за придобивките од неопходните витамини, минерали и останати корисни хранливи материи.
- Децата немаат свест за тоа дека сега е потребно да се хранат квалитетно за нивното здравје и во иднина. Затоа мора да се служите со мали трикови. Наместо да му кажете дека таа намирница е здрава, кажете му на детето дека од неа кожата или косата ќе му биде посјајна или дека ќе трча на тренинг побрзо и подобро.
- Не им оставајте избор што ќе купат за ужина или за десерт, оти секое трето дете ќе одбере еден од најрекламираните производи, наместо јаболко или свежо цеден сок.
- Учете ги да јадат сезонска храна и храна која вирее на нашето поднебје.
- Децата усвојуваат навики гледајќи ги родителите и најдобар начин детето да стекне правилни навики во исхраната е вие да се храните на начин на кој сакате да се храни и вашето дете.
