Температурите растат во цела Европа, а во наредниве денови ниту нашата земја нема да биде поштедена и се очекува да биде зафатена од голем топлотен бран, невообичаен за овој период од годината, кој ќе донесе температури и до 40 степени. Топлото време од западна и централна Европа се спушта кон Балканот, правејќи го животот неподнослив во услови на екстремни температури и висок УВ индекс.
Крвните садови се шират на топлина, што го намалува крвниот притисок. Затоа, доколку земате лекови за висок крвен притисок, консултирајте се со вашиот лекар дали е потребно прилагодување на терапијата. При високи температури се менува и згрутчувањето на крвта, па дехидрацијата може да доведе до локална тромбоза и оток на нозете
Високите температури особено ќе се одразат врз и онака кревкото здравје на хронично болните, на кои им се советува да не излегуваат надвор во периодот од 10 до 18 часот и редовно да ја земаат пропишаната терапија. Се препорачува пиење на доста течности и внес на полесна храна, престој во разладени простории, а излегување надвор никако без соодветна заштита, капа, очила за сонце и шише со вода. Ако веќе мора да излезете, направете го тоа порано наутро или пред крајот на денот кога температурите се пониски.
Она на што треба да внимавате е да ја надоместите течноста што ја губите преку потењето, бидејќи дехидрацијата може да биде многу опасна. За да се избегне ова, возрасните треба да пијат барем неколку голтки вода на секои 1 до 2 часа, додека децата треба да се охрабруваат со неколку лажички или голтки вода на секои 15 до 20 минути. Немојте да чекате чувството на жед да го зголеми внесот на течности, особено кај постарите кои имаат послабо чувство на жед, советуваат експертите.
Препорачливо е да се пие обична, негазирана вода или овошни чаеви. Течноста треба да биде на собна температура и најдобро да е без мраз, бидејќи многу изладената течност ќе поттикне саморегулирање на телесната температура и ќе го поттикне организмот на загревање. Избегнувајте алкохолни пијалаци и големи количини кафе и чај бидејќи имаат диуретично дејство.
Просторот во кој се престојува треба внимателно да се разладува. Ако користите клима-уред, немојте да претерате во разладувањето. Оптималната температура е помеѓу 4 и 6 степени пониска од температурата на надворешниот воздух. Значи, ако надвор има 32 степени, не треба да го спуштате термостатот под 26 степени во станот. Ова ќе му олесни на вашето тело да се прилагоди ако треба да излезете.
Ограничете ги активностите на децата на отворено, како што се спортските натпревари и други физички активности во најтоплиот дел од денот
Во разладување на телото може да ви помогнат и влажни крпи или марами кои ќе ги ставите на глава, раменици или каде и да ви одговара. Добра идеја е да наполните и шише со вода со распрснувач со кое повремено ќе се освежувате.
Никогаш не ги оставајте децата сами во затворен автомобил изложен на директно сонце!
Пред да излезете надвор, постепено подгответе го телото така што ќе постоите малку во влезот на зградата или надвор под сенка, за да се адаптирате на промената. Облечете лесна облека во светли бои и од природни материјали кои пропуштаат воздух. Капа и очила за сонце се задолжителни, а се препорачува и употреба на чадор. Одбегнувајте продолжено изложување на директна сончева светлина помеѓу 10 и 17 часот, како и физичка работа или напорни спортски активности на жештина. Ова важи и за возење велосипед, па дури и за градинарство. Секогаш носете шише вода со себе и од време на време пијте. Доколку е потребно, можете да натопите и марамче, кое малку ќе ви го разлади челото или вратот.
Имајте на ум дека крвните садови се шират на топлина, што го намалува крвниот притисок. Затоа, доколку земате лекови за висок крвен притисок, консултирајте се со вашиот лекар дали е потребно прилагодување на терапијата. При високи температури се менува и згрутчувањето на крвта, па дехидрацијата може да доведе до локална тромбоза и оток на нозете, бидејќи течноста останува во долните делови на телото. Затоа е добро почесто да одморате со стапалата во малку подигната положба.
На јаките жештини секогаш постои закана и од топлотен удар. Може да се развие нагло, без предупредувачки симптоми. Некои од симптомите се главоболка, вртоглавица и замор, со намалено потење и топла, црвена кожа која е сува. Срцевиот ритам се зголемува, па може брзо да достигне 160 до 180 отчукувања во минута. Се јавуваат и забрзано дишење и висока телесна температура, а во завршна фаза може да се појават и грчеви. Многу е важно брзо да се реагира: повикајте брза помош, ставете го пациентот во ладна или климатизирана просторија и ладете го постепено, истурајте млака вода и мавтајќи со лепеза. Ова ќе предизвика проток на воздух што ќе придонесе за пад на телесната температура.
ПРЕПОРАКИ ЗА НАСЕЛЕНИЕТО ЗА ЗАШТИТА ОД ТОПЛОТНИ БРАНОВИ: Како да се однесуваме при високи температури
За време на топлотни бранови, здравјето на бебињата и децата може да се влоши брзо. Треба да се преземат одредени мерки на претпазливост за да им биде поудобно и да се намалат здравствените ризици, се вели во препораките на веб-страницата на ИЈЗ
ВОЗРАСНИ
За време на топлотни бранови, Вашето здравје може да се влоши брзо. Треба да се преземат одредени мерки на претпазливост за да бидете поудобни и да ги намалите здравствените ризици за Вас и Вашите најблиски.
Освежувајте се често:
- Бидете добро хидрирани. Пијте 6-8 чаши безбедна вода дневно.
- Често туширајте се, за да се лади телото.
- Поминувајте најмалку 2 часа на ден во климатизирани места (библиотеки, трговски центри и сл.).
Заштитете се од топлина:
- Ограничете го физичкиот напор. Ограничете ја физичката активност, особено во средината на денот, кога е најтопло.
- Носете светла облека и лесна облека, наочари за УВ заштита и капа.
- Користете креми со заштитен УВ фактор.
- Следете ги препораките на здравствените установи од Вашиот регион.
- Избегнувајте непотребно излегување надвор во период од 10 до 17 часот.
- Одбегнувајте алкохол и алкохолни пијалоци, како и пијалаци што содржат кофеин како и екстремно ладни пијалаци.
- Избегнувајте премногу масна и високо калорична храна, како и храна која содржи шеќери.
ЗА БЕБИЊА И ДЕЦА
За време на топлотни бранови, здравјето на бебињата и децата може да се влоши брзо. Треба да се преземат одредени мерки на претпазливост за да им биде поудобно и да се намалат здравствените ризици.
Хидрирајте ги Вашите деца:
- Дајте им чаша вода на секои 20 минути.
- Почесто дојте го Вашето бебе.
Освежувајте ги Вашите деца често:
- Во базен или во бања или туш најмалку двапати дневно.
- Освежете ја кожата со влажна крпа неколку пати на ден.
Заштитете ги Вашите деца од топлина:
- Облечете ги во лесна облека.
- Покријте ја главата со широка шапка.
- Никогаш не ги оставајте сами во слабо вентилирана просторија.
- Никогаш не ги оставајте сами во затворен автомобил изложен на директно сонце.
Ограничете ја нивната изложеност на топлина:
- Ограничете ги нивните активности на отворено, како што се спортските натпревари и други физички активности во најтоплиот дел од денот.
- Планирајте активности на отворено пред 10 часот и по 15 часот. Кога топлината е помалку интензивна и УВ зрачењето е помало.
