Колку пати сте го затекнале детето како омилената играчка ја влече по земја или ја крие под кревет, за десет минути подоцна да ја стави во уста или ја земе со себе на спиење? Децата, се до првите години во училиште, немаат реален поим за хигиената и опасностите кои се кријат од нечистотијата. Затоа, освен за хигиената на детето и просторот во кој тоа престојува, родителите мораат да водат сметка и за чистењето на играчките.
Како се одржуваат детските играчки?
Колку често и на кој начин ќе ги чистите играчките, зависи од тоа како детето ги користи и од каков материјал се направени. Доколку одредени играчки се користат само дома, во контролирана средина, доволно е да се чистат од прашина еднаш неделно, а подетално чистење може да се врши квартално. Сепак, играчките кои детето ги носи насекаде со себе, како и оние што се носат надвор, мора да се чистат речиси секој ден.
Почесто ќе ги чистите играчките доколку детето ги носи надвор, ги дели со други деца со кои не живее, ако е настинато и особено ако има некоја од заразните или паразитски болести.
ПРАВИЛНО ЧИСТЕЊЕ
Играчки од пластика
Тие навистина се најлесни за одржување, под услов да не се на батерии и да немаат никаков механизам во себе. За брзо чистење се доволни влажни марамчиња или влажна крпа, а одвреме-навреме можете да ги исчистите со благ шампон или детергент за миење садови. Кога ги чистите пластичните играчки, погрижете се темелно да ја исчистите целата површина и скриените делови. Добро исушете ги играчките пред повторно да му ги дадете на детето.
Играчки од дрво
Ако дрвените играчки на вашето дете се полирани или лакирани, можете да ги чистите на ист начин како и пластичните: со благ шампон или детергент со добро плакнење. Само внимавајте дрвените играчки да не ги потопувате во вода, за да не ја впијат, па да се деформираат или оштетат.
Ако играчките не се заштитени со лак или масна боја, за бришење, користете благ раствор од 1:3 јаболков или алкохолен оцет и 2:3 вода. Избришете ги со крпа натопена во растворот, а потоа добро исушете ги со сува крпа. По ваквото бришење, добро проветрете ги играчките за да го изгубат непријатниот мирис.
Плишани играчки
Плишаните играчки обично имаат етикета со упатство за одржување. Важно е редовно да ги тресете за да не се насобира прашина. Одвреме-навреме можете да ги перете во машина за перење, под услов да немаат механизам на батерии. Ако имаат, прво мора внимателно да го отстраните механизмот.
Ако тоа не е можно, тогаш немојте да ја перете играчката, туку дезинфицирајте ја со благ раствор од асепсол. Дамките можете да ги отстраните така што ќе направите блааг сапуница и со кружни движења ќе ја истриете играчката, а потоа ќе ја исушите со фен.
