Проблем со намален апетит кај децата пријавуваат дури 25 проценти од родителите. Најчесто, тие бараат совет од педијатар кога детето кое претходно јадело без проблем, одеднаш почнува да одбива храна или јаде значително помалку.
Според педијатрите, ваквата промена често се забележува по шестиот месец од животот. Во тој период интересот на доенчето за храна природно се менува, па детето може да јаде помалку отколку во претходните месеци. Доколку детето е во добра општа состојба, активно е и правилно напредува во телесната тежина, најчесто нема причина за загриженост.
Сепак, важно е родителите да не создаваат дополнителен притисок околу храната. Форсирањето оброци, уценувањето или наградувањето за изедена храна може да создадат уште поголем отпор кај детето.
Педијатрите советуваат неколку едноставни навики кои можат да помогнат во поттикнување на апетитот:
- Почитувајте го апетитот на детето, но и периодите кога нема желба за јадење
- Не го присилувајте да јаде ако не е гладно
- Избегнувајте награди или казни поврзани со храната
- Вклучете го детето во изборот и подготовката на оброците
- Послужувајте помали порции и дозволете само да побара дополнително
- Одржувајте редовен распоред за оброци
- Трпеливо воведувајте нови намирници
- Поттикнувајте секојдневна физичка активност и престој на свеж воздух
Најважно е родителите да останат смирени и да го следат целокупниот развој на детето, а не само количината на изедена храна во текот на денот.
