„Верувај ми, знам што е добро за тебе“ е реченица што многу родители сакаат да му ја пренесат на своето дете. Но, кога е кажана со нервоза, повишен тон или во момент на расправија, детето лесно може да ја сфати како критика, а не како поддршка.
Психолозите советуваат дека најдобар пристап е разговор со едноставни и смирени реченици кои ги прифаќаат чувствата на детето, но истовремено поставуваат јасни граници и правила.
Ова се неколку важни реченици кои можат да помогнат во секојдневната комуникација со децата:
„Морам да размислам за тоа“
Родителите често чувствуваат притисок веднаш да дадат одговор на секое детско барање. Но, брзите реакции понекогаш носат нервоза и зборови за кои подоцна жалиме.
Со оваа реченица си давате време да размислите, а воедно му покажувате на детето дека не мора секоја реакција да биде импулсивна. Така го учите и него да размислува пред да реагира.
„Како се чувствуваш поради тоа?“
Кога детето ќе направи нешто добро, важно е да не го пофалите само резултатот, туку да го поттикнете да размисли и за своите чувства.
Ова прашање помага детето подобро да ги препознае сопствените емоции и да развие емоционална зрелост. Истото може да биде корисно и кога ќе направи грешка — наместо веднаш да се лутите, разговарајте за тоа како се чувствува поради својата постапка.
„Ајде да најдеме нешто добро и во ова“
Разочарувањата се дел од детството — откажано дружење, расипана игра или дождлив ден. Наместо веднаш да го оттурнете тагувањето, дозволете му на детето да ги изрази емоциите.
Откако ќе се смири, помогнете му да ја види и позитивната страна на ситуацијата. Така детето учи полесно да се справува со непријатните моменти и да развива оптимистички поглед.
„Диши длабоко“
Децата, исто како и возрасните, понекогаш чувствуваат тензија и преоптовареност. Потсетувањето да застанат и длабоко да вдишат може многу да помогне во стресни ситуации.
Најважно е и родителите да бидат пример за смирено однесување, бидејќи децата најмногу учат преку набљудување.
„Одиме од почеток“
Кога детето ќе реагира бурно, ќе одбие да сподели играчка или инсистира веднаш да добие нешто, оваа реченица е добар начин мирно да го насочите кон посоодветно однесување.
Наместо карање, му давате можност повторно да се обиде на подобар начин.
„Одлична идеја“
Поддршката и охрабрувањето се важни за развојот на детската самодоверба. Кога ќе ги пофалите идеите на детето — без разлика дали се мали или големи — му помагате да верува во себе и полесно да решава проблеми.
