Сите деца се раѓаат со трет крајник. Станува збор за маса од лимфно ткиво која се наоѓа во ждрелото, веднаш над мекото непце и носните шуплини, па затоа не може да се види со голо око. Тој е дел од природниот одбранбен систем на организмот и има важна улога во раното детство, кога имунитетот сè уште се развива. Заедно со останатите крајници, помага во препознавање и задржување на бактериите и вирусите што навлегуваат преку носот и устата.
Децата поради зголемен трет крајник може да имаат и проблеми со слухот. Неговата големина може да варира – од големина на цреша, па сѐ до орев
Неговата големина не зависи од возраста на детето. Кај некои деца е многу мал, а кај други може значително да се зголеми. Обично околу деветтата година почнува постепено да се намалува, а во пубертетот кај повеќето деца речиси целосно исчезнува. Само ретко останува присутен и во возрасна доба.
Која е функцијата на третиот крајник?
Како што споменавме, третиот крајник има иста улога како и останатите крајници – учествува во одбраната на организмот од инфекции. Кај повеќето деца тој е со нормална големина и не предизвикува проблеми.
Но, кога е воспален или зголемен, може да стане причина за различни здравствени тегоби. Често е поврзан со воспаленија на средното уво и слузницата на носот. Детето тогаш може да има постојано течење на носот или секрет што се слева низ ждрелото и го голта.
Ако е значително зголемен, може механички да го попречува дишењето преку нос и нормалната дренажа на средното уво. Поради тоа, кај некои деца честите инфекции на третиот крајник може да доведат и до бронхитис.
Како да препознаете дека детето има зголемен трет крајник?
Постојат повеќе симптоми што можат да укажуваат на зголемен трет крајник. Таквите деца често:
- зборуваат „низ нос“,
- дишат со отворена уста,
- ноќе ’рчат,
- имаат слаб апетит,
- изгледаат бледо,
- имаат продолжена кашлица или постојано течење на носот.
Ако забележите дека детето послабо слуша или често бара да му повторувате, можно е причината да биде токму третиот крајник.
Дали третиот крајник може да предизвика проблеми со слухот?
Да. Во близина на третиот крајник се наоѓаат отворите на Евстахиевите туби – канали што го поврзуваат средното уво со ждрелото. Кога крајникот е зголемен, може да ги затне овие канали и да предизвика воспаление на средното уво.
Доколку воспаленијата често се повторуваат, постои ризик од оштетување на слухот.
Важно е да се знае дека третиот крајник не мора да биде воспален за да создава проблеми. Дури и кога не е инфициран, но е зголемен, може да предизвика намален слух без очигледни симптоми, па родителите понекогаш доцна го забележуваат проблемот.
