Социјализацијата во детството и адолесценцијата има важна улога во емоционалниот и психолошкиот развој на детето. Дружењето со врсници, чувството на припадност и учеството во заеднички активности помагаат детето да изгради самодоверба, емпатија и здрави односи со околината.
Но, кога детето е изолирано и повлечено подолг период, последиците не се само социјални. Истражување спроведено во Шведска на околу 900 испитаници покажало дека лицата кои биле изолирани од врсниците во адолесценцијата, во подоцнежните години почесто развивале здравствени проблеми како висок крвен притисок, прекумерна тежина и дијабетес.
Според стручњаците, долготрајната асоцијалност може да го зголеми ризикот и од кардиоваскуларни заболувања, особено ако детето расте без чувство на прифатеност и емоционална поврзаност.
Осаменост и асоцијалност не се исто
Психолозите предупредуваат дека е важно да се направи разлика меѓу осаменост и асоцијалност.
Осаменоста често е привремена состојба и може да биде последица на одредени животни ситуации. Осамените деца најчесто сакаат да се дружат и немаат проблем да се поврзат со другите кога ќе добијат можност.
Од друга страна, асоцијалноста подразбира подлабока незаинтересираност за комуникација и тешкотии во емоционалното поврзување со другите луѓе. Таквите деца често избегнуваат групни активности и потешко развиваат блиски односи.
Улогата на училиштето и родителите е клучна
Стручњаците потенцираат дека социјализацијата треба да се поттикнува уште од најрана возраст. Училиштата имаат важна улога во создавање средина во која сите деца ќе се чувствуваат прифатени и вклучени, без разлика на успехот, карактерот или семејниот статус.
Родителите, пак, треба да поттикнуваат повеќе дружење, игра и активности на отворено. Иако технологијата често се обвинува за сè поголемата изолираност кај децата, голем дел од одговорноста е и кај возрасните.
Понекогаш е полесно детето да остане дома пред екран отколку да игра надвор и да се врати валкано, но токму дружењето, играта и контактот со врсниците се важен дел од здравото растење и развој.
