„Мерeдит Греј досега ќе измислеше вакцина против COVID-19“: Тема на новата сезона на „Вовед во анатомија“ ќе биде коронавирусот

Докторите со кои соработуваме ни носат разни приказни и случки од секојдневната работа. Оваа година тоа е како терапија за нив. Се обидуваат да не заплачат, бледи се и за короната зборуваат како за војна за која не биле истренирани, вели извршната продуцентка Криста Венроф

Популарната ТВ серија се враќа на екраните, очекувано со фокус на коронавирусот

„Мередит Греј (Елен Помпео) досега ќе измислеше вакцина против COVID-19“, се шегуваат фановите на популарната медицинска ТВ серија „Вовед во анатомија“, во очекување на новите продолженија.

Конечно добра вест од тимот на „Вовед во анатомија“ – долгоочекуваната нова, 17. сезона ќе се снима, а нејзиниот фокус ќе биде пандемијата на коронавирус, информира извршната продуцентка Криста Венроф.

На радост на милионите фанови ширум светот, наскоро се очекува да започне снимањето на новите продолженија, откако последната 16. сезона беше прекината поради актуелната состојба со пандемијата на коронавирус.

„Повеќегодишна серија со медицинска тематика не може да се снима, а притоа да не се спомене коронавирусот, главната здравствена тема на нашето време. Сигурно ќе ја обработиме. Докторите со кои соработуваме ни носат разни приказни и случки од секојдневната работа. Оваа година тоа е како терапија за нив. Се обидуваат да не заплачат, бледи се и за короната зборуваат како за војна за која не биле истренирани“, изјави Криста во рамките на виртуалниот панел „Quaranstreaming: Comfort TV That Keeps Us Going“.

По 16 сезони, „Вовед во анатомија“, која се прикажува од 2005 година останува најдолгата медицинска драма на телевизија, чие дејство е концентрирано во фиктивната „Grey Sloan Memorial Hospital“. Во изминатите сезони, серијата се занимаваше со теми како бездомници, силување, депортација и расизам.