Психијатарката Ким Сејџ на социјалните мрежи предупреди на новиот родителски стил наречен родителство во лушпа од јајце.
„Во сржта на овој емоционално несигурен родителски стил е реална емоционална загрозеност. Со него се става детето во позиција во која секогаш мора да биде претерано внимателно околу тоа што може да се случи“, објаснува д-р Сејџ.
Психијатарот Зишан Кан за списанието Parents објаснува дека овој стил на родителство е сè попопуларен на ТикТок, но многумина не се свесни дека тоа не е нешто што се учи.
„Оној што го следи родителството во лушпа од јајце, тој едноставно е таков“, вели тој.
Главната карактеристика на овој стил е непредвидливоста
Психотерапевтката Ана Хиндел дава пример за родител во лушпа од јајце.
“Кога родителот има нестабилни расположенија, испади и недоследно однесување, неговите деца шетаат околу него како по лушпи од јајца. Затоа и се нарекува така”, објаснува Хиндел и наведува дека главната карактеристика на овој стил е непредвидливоста.
„Вообичаено е некои родители брзо да го менуваат расположението. Најекстремните форми на родителство во лушпа од јајце вклучуваат сериозно психичко злоставување кое може да предизвика промена на улогите помеѓу родителот и детето. Детето се чувствува одговорно за своите родители и се обвинува себеси кога работите не одат по желба на родителите“, додава.
Родителите кои го практикуваат овој стил веројатно пораснале во нестабилна средина и не научиле да се справуваат со непријатните чувства. Ако родителите не ги решат своите проблеми од минатото кои предизвикуваат нестабилност во сегашноста, нивните реакции влијаат на сите околу нив, вклучувајќи ги и децата.
Терапијата може да помогне
Според Хиндел, родителството во лушпа од јајце може да доведе до долгорочни потешкотии за детето, вклучувајќи анксиозност, депресија и нестабилно расположение. Поради оваа причина, советуваат психијатрите, најдобро е да побарате стручна помош од терапевт. Некои тактики кои можат да помогнат се когнитивна бихејвиорална терапија, психодинамичка психотерапија и интерперсонална терапија.
