Иако за време на бременоста се зголемуваат потребите за хранливи материи, прекумерниот внес, особено на калорична храна, не е добар ниту за мајката ниту за детето. Еднаш наталожениот вишок килограми тешко се симнува, а големиот раст на тежината за време на бременоста може да има и сериозни здравствени последици. Идните мајки многу често слушаат дека мора да јадат за двајца, но дека тоа не е така, за Мис Мама објаснува прим. д-р сци. Ула Мартон, специјалистка по гинекологија и акушерство.
Оброците мора да бидат планирани, но не е толку важна количината колку што е разновидноста. Тие мора да изобилуваат со овошје и зеленчук, а никотинот и алкохолот се забранети во бременоста
„Под уреден раст на тежината за време на бременоста се смета од 10 до 14 килограми, а 3,5 килограми волумен на масно ткиво се потребни за мајката да има доволни енергетски залихи за доење на детето“, појаснува д-р Мартон, додавајќи дека на идните мајки дневниот внес на калории им се менува, односно расте за 200 до 250 kcal поради зголемената метаболичка потрошувачка за време на растот на детето. Затоа оброците мора да бидат планирани, но не е толку важна количината колку што е разновидноста. Оброците мора да изобилуваат со овошје и зеленчук, а никотинот и алкохолот се забранети.
Прекумерното дебелеење е поврзано со низа дополнителни компликации, како во бременоста, така и при породувањето. „Големиот раст на килограми за време на бременоста може да го промени метаболизмот на гликозата кај мајката, а тоа како последица има поголем раст на детето. Тоа може да предизвика подолго и потешко породување, со послаби контракции“, објаснува гинекологинката.
Здрави замени за благо
За ненадејните желби за храна може да се најдат соодветни замени:
- Замрзнат јогурт наместо сладолед;
- Суво грозје наместо бонбони;
- Леб од банана наместо колачи;
- Переци наместо чипс.
На трудниците им се потребни повеќе протеини, витамини и минерали, како што се фолната киселина и железото (црвено месо, мешунки, риба, лиснат зеленчук…). Внесот на калории се зголемува дури во второто тромесечје. Почестите, а помали оброци ќе ја спречат појавата на киселини.
