Новата студија на Американскиот центар за контрола и превенција на болести (ЦДЦ) дава одговор на прашањето на кое научниците се обидуваат да одговорат уште од почетокот на пандемијата: колкав имунитет има лице кое прележало инфекција со коронавирус и каков е тој имунитет во споредба со имунитетот по вакцинацијата против Ковид-19?
Најновата голема студија на ЦДЦ објавена во петокот, која се заснова на анализира на бројни студии и сопствени необјавени податоци, открива дека имунитетот предизвикан од инфекција со SARS-CoV-2 и оној добиен по пат на вакцинација трае најмалку шест месеци, но дека вакцините се подоследни во заштитата и даваат огромен поттик за производство на антитела кај луѓето кои претходно се заразиле со Ковид-19.
Според „Вашингтон пост“, споредувајќи ги двата типа на имунитет, научниците дошле до заклучок дека вакцинацијата обезбедува „повисоко и поконзистентно ниво на имунитет од самата инфекција“.
Нивоата на антитела варираат по инфекцијата
Инфекциите со коронавирус може да предизвикаат тешка болест, но и асимптоматска болест, а ЦДЦ открива дека нивоата на антитела по инфекцијата варираат многу од поединец до поединец.
Во извештајот, исто така, се наведува дека не постои универзален тест одобрен од Администрацијата за храна и лекови што ќе им овозможи на лекарите и на јавноста веродостојно да го измерат имунитетот на поединецот по некоја болест. Иако повисоките нивоа на неутрализирачки антитела обично сигнализираат поголема заштита, научниците сè уште не знаат точно колкави нивоа на антитела се потребни за да се заштити поединецот од нова инфекција, пишува „Вашингтон пост“.
Достапните докази покажуваат дека целосно вакцинираните поединци и оние претходно инфицирани со SARS-CoV-2 имаат низок ризик од инфекција во текот на најмалку 6 месеци. Податоците во моментов се недоволни за да се одреди прагот на титарот на антитела што укажува кога поединецот е заштитен од инфекција
Заклучокот на студијата на ЦДЦ е: Со оглед на она што е познато, и што не е познато за имунитетот, луѓето кои биле заразени со вирусот сепак треба да се вакцинираат.
Заклучокот на оваа студија потсетува на друга студија, објавена од ЦДЦ претходно, која докажа дека вакцините обезбедуваат повисоко ниво на заштита отколку претходна инфекција. Таа студија вели дека вакцинираните пациенти хоспитализирани со симптоми слични на ковид имаат помала веројатност да бидат позитивни на вирусот отколку оние кои се опоравиле од инфекцијата неколку месеци порано. Со други зборови, кај вакцинираните пациенти кои имаат симптоми на Ковид поголема е веројатноста да не бидат заразени со Ковид, туку да имаат некоја друга болест.
Како е спроведена студијата?
Научниците од ЦДЦ анализирале повеќе од 90 рецензирани студии и публикации за да разберат колкаво ниво на заштита имаат луѓето кои прележале Ковид, и оние кои не прележале, но биле вакцинирани. Поголем број на студии покажале дека вакцинацијата го стимулира имунолошкиот одговор кај луѓето кои прележале Ковид и дополнително го намалува ризикот од повторна инфекција.
„Иако се чини дека постојат различни докази за заштитата која се јавува по прележување на болеста во споредба со заштитата по комплетна вакцинација, постојат значајни имунолошки и епидемиолошки докази дека вакцинацијата по инфекцијата дополнително ја подобрува заштитата“, се вели во студијата на ЦДЦ.
Дали по прележана болест е доволна само една доза од вакцината?
Дејвид Рубин, педијатар и директор на Детската болница во Филаделфија, вели за „Вашингтон пост“ дека ги советува своите пациенти и членови на семејствата кои го прележале Ковид дека е доволно да примат една доза од вакцината за зајакнување на имунитетот.
- „Прележувањето на болеста може да се гледа како една доза на вакцина. Ако сте прележале Ковид-19, земете барем една доза од вакцината“, рече тој
Во септември, повеќе од десет земји, вклучувајќи ги Франција, Германија, Италија и Шпанија, препорачаа луѓето кои имале Ковид-19 да добијат само една доза од вакцината (во случај на вакцини кои се даваат во две дози).
Клучни заклучоци
ЦДЦ конечно ги наведува клучните заклучоци од својата студија:
- Достапните докази покажуваат дека целосно вакцинираните поединци и оние претходно инфицирани со SARS-CoV-2 имаат низок ризик од инфекција во текот на најмалку 6 месеци. Податоците во моментов се недоволни за да се одреди прагот на титарот на антитела што укажува кога поединецот е заштитен од инфекција;
- Имунитетот што го обезбедува вакцината и претходната инфекција е висок, но не е целосен (т.е. не е 100%);
- Додека постои широк распон на титар на антитела како одговор на инфекција, вакцинацијата со две дози, особено со mRNA вакцините, обично резултира со поконзистентен и повисок титар на почетниот одговор на антителата;
- За одредени популации, како што се постари лица и лица со ослабен имунитет, нивото на заштита може да се намали по вакцинацијата и инфекцијата;
- Сегашните докази сугерираат дека нивото на заштита можеби нема да биде исто за сите вирусни варијанти;
- Значајни имунолошки докази и сè поголем број епидемиолошки докази укажуваат на тоа дека вакцинацијата по инфекцијата значително ја подобрува заштитата и дополнително го намалува ризикот од повторна инфекција, пренесува „Индекс“.
