Со почетокот на новата учебна година се соочуваме со различни предизвици, а еден од нив секако е и воспоставување на добра концентрација кај децата. По тримесечниот летен распуст потребно е многу брзо тие да се вратат во училишното секојдневие.
Еден од начините секако е и повторното воспоставување на контрола на она што го јадат децата. Признаваме, за време на распустот си дадовме малку олабавување, и ние, и тие.
Студиите покажуваат дека со исхраната може да се влијае на концентрацијата и поради тоа од огромно значење е како ќе изгледа детското мени. Не е лошо да се потсетиме дека исхраната која изобилува со додадени шеќери и вештачки адитиви има негативно влијание на концентрацијата на децата, а исхраната која изобилува со свежо овошје и зеленчук, како и со протеини има позитивно влијание.
Не треба да се заборави ниту на бројот на оброци што детето ги има во текот на денот. Појадокот обезбедува енергија, стабилен апетит и концентрација, додека ужината ја дополнува енергијата во текот на денот.
Ова се некои хранливи материи кои имаат позитивно влијание на концентрацијата.
Омега 3 масни киселини – добрите масти помагаат да се изградат здрави мембрани кои лесно ќе ги пренесат хранливите материи во мозочните клетки. Затоа, воведете риба најмалку двапати неделно и со тоа зголемете го внесот на омега 3 масни киселини за добро расположение.
Цинк – ова е есенцијален олигоелемент кој е најзастапен во храната од животинско потекло и игра значајна улога во когнитивниот развој. Најмногу го има во намирниците од животинско потекло.
Магнезиум – се смета за еден од најважните минерали бидејќи контролира или влијае на исклучително голем број процеси во организмот, вклучувајќи: добар сон, расположение, концентрација и енергија. Добар извор на магнезиум се: семките, јаткастите плодови, мешунките и зелениот лиснат зеленчук.
Железо – недостатокот на овој минерал предизвикува замор, пад на енергијата и со тоа слаба и лоша концентрација. Обезбедете доволен внес на железо преку црвено месо, мешунки, семиња и лиснат зеленчук.
Витамин Ц – антиоксидант кој е неопходен за производство на невротрансмитерот норепинефрин, кој влијае на контролата на вниманието и реакцијата. Се наоѓа во свежото овошје и зеленчук.
Протеини – одржуваат ситост подолго време и на тој начин спречуваат пад на енергијата, а со тоа и на вниманието и концентрацијата.
