Истражувачите откриле дека вирусното оптоварување, односно количината на вирус откриена во организмот низ различни фази на инфекција со SARS-CoV-2, го достигнува својот врв во горните дишни патишта рано во текот на болеста, помеѓу појавата на симптоми и петтиот ден
Луѓето кои се позитивни на COVID-19 најверојатно се најзаразни во првите пет дена откако ќе развијат симптоми, потврдува новата студија, истакнувајќи ја потребата за брза изолација.
Истражувањето објавено во стручното списание „Lancet“, исто така, укажува на тоа дека асимптоматските лица можат побрзо да го отстранат вирусот од своето тело и да бидат заразни пократко време.
Во првиот преглед од ваков вид истражувачите анализирале податоци од 98 претходни студии за пренесување на инфекцијата со коронавирус. Тие ги споредиле своите откритија за COVID-19 со уште два други соја на коронавирус за подобро да разберат зошто COVID-19 се шири толку брзо.
Откриле дека вирусното оптоварување, односно количината на вирус откриена во организмот низ различни фази на инфекција со SARS-CoV-2, го достигнува својот врв во горните дишни патишта рано во текот на болеста, помеѓу појавата на симптоми и петтиот ден.
Ова е важно затоа што вирусот во горните дишни патишта се смета за главен извор на пренесување.
За споредба, вирусното оптоварување за два други соја на коронавирус, SARS-CoV и MERS-CoV, достигнува максимум подоцна, помеѓу 10 и 14 дена односно 7 и 10 дена, обезбедувајќи повеќе време за препознавање на симптомите и изолирање, пренесува HuffPost.
