Набргу по раѓање на детето, лекарот, бабицата или медицинската сестра на одделот за неонатологија ќе проверат дали вашето бебе е добро. Се врши темелен преглед на новороденчето, познато како “проверка на новороденче“, а обично се проверуваат очите, срцето, колковите и гениталиите на бебето.
Очи
Се проверува изгледот и движењето на очите за да се утврди дали постојат некои видливи потешкотии како што се катаракта, заматување на проѕирната леќа внатре во окото. Овој преглед не може да каже колку е добар видот на вашето дете.
Срце
На бебето ќе му се опипа пулсот и со стетоскоп ќе му се слушне срцето. На овој преглед може да се откријат евентуални шумови на срцето, кога отчукувањата на срцето имаат дополнителен или необичен звук. Тие се чести кај бебињата и, и покрај шумот, срцето е, речиси во сите случаи, нормално. Околу 1 од 200 бебиња имаат проблеми со срцето кои треба да се лекуваат.
Колкови
Кај некои новороденчиња, зглобовите на колкот не се правилно формирани. Ако не се лекуваат, може да дојде до проблеми со зглобовите, но само 1 или 2 од 1.000 бебиња имаат проблем кој треба да се лекува.
Тестиси
На момчињата им се проверуваат тестисите, односно дали се на вистинското место. За време на бременоста, тестисите се формираат во телото на бебето. Тие можат да се спуштат во скротумот дури неколку месеци по раѓањето.
Кај околу едно од 100 момчиња, тестисите се спуштаат само делумно или воопшто не се спуштаат, што е потребно да се лекува за да се спречат можни идни проблеми како што е намалената плодност.
Проверка на слухот на новороденчето
Проверката на слухот кај новороденчето се прави набрзо по раѓањето и се прави за да се откријат проблеми како трајно губење на слухот што е можно порано.
Непосредно пред заминувањето на мајката и бебето од породилиштето, детето уште еднаш се прегледува. Ова се прави затоа што некои срцеви мани не се слушаат на раниот преглед, а може да се слушнат на третиот или четвртиот ден. На овој преглед детето прима задолжителна БСЖ вакцината, за што мајката добива книшка за имунизација на детето.
