Она што децата го јадат, може да влијае на развојот на важни структури и врски во мозокот. За да им помогнат на родителите да разберат што им треба на бебињата, американските педијатри објавија збир на препораки за храна кои обезбедуваат здрав развој на мозокот во првите илјада дена од бебето.
Насоките на Американската академија за педијатрија, објавени во списанието Pediatrics, ги наведуваат протеините, цинкот, железото, фолатите, одредени витамини и незаситените масни киселини како најважни хранливи материи.
„Исхрана во која недостасуваат овие хранливи материи може да доведе до доживотни проблеми со мозокот“, напишале педијатрите.
Д-р Сара Џејн Шварценберг, членка на Одборот за исхрана на Американската педијатриска академија вели дека се препорачува ексклузивно доење до околу шестиот месец од животот. После тоа, мајчиното млеко не може да ја обезбеди количината на железо и цинк што им е потребна на бебињата кои растат.
„Многу храна за бебиња е збогатена со цинк и железо, но пасираното месо е добар природен извор на овие хранливи материи. Житарките за доенчиња исто така се збогатени со овие нутриенти и можат да бидат добра прва храна за бебињата“, вели д-р Шварценберг.
Доенчињата се многу чувствителни на недостаток на хранливи материи
Покрај мајчиното млеко, најдобра исхара за бебињата е онаа која вклучува разновидни намирници како месо богато со протеини и овошје и зеленчук кои содржат различни витамини и минерали.
„Доенчињата се многу чувствителни на недостаток на хранливи материи. Нивниот мозок се развива со голема брзина помеѓу првата и втората година, па затоа сакаме педијатрите да препорачаат здрав спектар на намирници“, додава докторката.
Студиите покажуваат дека раната исхрана е важна за градењето здрав мозок.
„Ако ја пропуштите можноста да ги запознаете развојните пресвртници во текот на првите 1.000 дена од животот, не постои шанса да го вратите времето назад и да го надоместите изгубеното“, вели д-р Шварценберг.
Таа појаснува дека железото е клучно за поставување мемориски кола и брзина на обработка во мозокот. Иако е полесно да се хранат бебињата со нивната омилена храна, д-р Шварценберг напоменува дека е важно да се обезбеди низа здрави намирници.
„Сите ние имаме тенденција да избереме една или две работи што му се допаѓаат на детето и да не отстапуваме премногу од нив, но ако сакате да развиете добро здравје на мозокот, тогаш навистина треба да обрнете внимание на разновидната храна“, заклучува таа.
