Децата треба да знаат што мислиме и чувствуваме за нашата улога како родители. Сакаат да знаат дека можеме да се справиме со големи и страшни ситуации и дека улогата на родител не ни е товар, туку радост и привилегија.
Исто така, децата во секој момент треба да знаат која е нивната улога во тој однос, за да не ги потиснуваат своите потреби бидејќи мислат дека така ќе ги загрозат своите родители. Психологот Ели Харвуд ги советува родителите кои пет важни реченици и пораки треба да им ги кажуваат на своите деца.
Нема ништо во животот што не можеме заедно да се обидеме да го решиме.
Многу деца, а подоцна и како возрасни, се борат сами со сопствените стравови и тешки ситуации. Под ова често се крие уверувањето дека нивните родители тоа не можат да го поднесат, па детето не сака да ги оптоварува.
Можеш да ме прашаш и можеш да ми кажеш што било. Јас секогаш ќе бидам твое безбедно место за сите необични и непријатни ситуации и разговори.
Децата треба да знаат дека ние сме нивниот безбеден простор и дека нема да им судиме. Единствено така ќе ни се доверат кога е важно.
Не е твоја задача да ме правиш среќен/а, туку да откриеш кој си и да бидеш доследен на тоа.
Кога детето се чувствува слободно да биде свое, помала е веројатноста да се бори со депресија, зависност или кое било друго нарушување. Исто така, помала е веројатноста да ви замерат што не сте ги поддржале во нивната вистинска природа.
Ако ми кажеш дека некој те исплашил или те повредил, секогаш ќе ти верувам, без оглед за кого се работи.
Злоупотребата на децата се случува во различни форми, а често и од луѓе што ги познаваме и ни се блиски. Детето треба да знае дека имаме доверба во него и дека ќе знаеме како да реагираме и да му помогнеме да се справи со оваа тешка ситуација.
Ништо не ми должиш. Те донесов на овој свет и тоа што сум твој родител ми даде повеќе радост отколку што можев да замислам.
Со оваа реченица го отстрануваме товарот што детето понекогаш несвесно си го става на себе и му даваме слобода со нас да гради однос од љубов, а не од чувство на вина или должност.
