РЕЦЕПТ НА ДЕНОТ: Клафути – тарт крем со цреши

Неверојатно вкусен и кремаст десерт, а супер едноставен за подготовка. Крем тарт – клафути е стар француски десерт кој во оригинал се подготвува со црни цреши, но не е невообичаено да се користи и друго овошје. Кога се подготвува со цреши, рецептот начага црешите да не се чистат од семките. Постојат две причини за тоа, едната е дека кога црешите се цели не го испуштаат својот сок во колачот, а втората е дека при печењето, семките испуштаат хемиско соединение кое на колачот му дава бадемаст вкус.

Потребно:

  • 400гр зрели цреши
  • 4 јајца
  • 150гр брашно
  • 150гр путер
  • 200мл млеко
  • 120гр шеќер
  • 1 ванила
  • 1 шолја ликер од вишни, рум, cherry brandy или слично

Подготовка: Овошјето се потопува во ликерот или пијалокот што сте го одбрале. Најдобро е да отстои барем еден час. Садот за печење се премачкува со путер, но во обилна количина. На дното се распоредуваат црешите. Јајцата малку се матат со рачна маталка . Потоа се додава брашното и се продолжува да се меша. Но, никако со мискер. Треба да матите додека не добите смеса без грутки. Се додава растопениот путер, кој малку се оладил, значи да не биде врел. Се продолжува да се меша додека не се добие фина изедначена смеса. Се додава млекото, па на крај шеќерот и се продолжува да се меша. На крај се додава ванилата и полека смесата се прелева врз овошјето. Се става да се пече во веќе згреана рерна на 200 степени – 15 минути, а потоа се намалува температурата на 170 и се продолжува да се пече колачот уште 15 минути. Со чепкалка се проверува дали тестото е печено во средина, така пто кога ќе ја извадите чепкалката, на неа да не останува тесто. Се вади од рерна колачот и се ставаат врз него неколку парчиња путер и се враќа да се допече уште 5 минути. Се остава тестото малку да “падне“ и се сече кога целосно ќе се олади. Може одозгора да се нароси со шеќер во прав и да се послужи со сладолед.

ПОВРЗАНИ НАПИСИПОВЕЌЕ ОД АВТОРОТ