Додека не станете родител, навистина не сте свесни колку пати имате обврска во текот на денот да кажете – не, немој, престани, стој, остави го тоа.
Во суштина, додека вие гледате потенцијалната опасност, вашето дете гледа занимација. „Не си ги лижи патиките“, „не ги ставај нечистите прсти во уста“, „не треба да те интересира каков вкус има подот во лекарската ординација“ – се се тоа реченици што преминуваат преку родителските усти. Многу постари генерации ќе ви кажат да се опуштите и дека тоа е добар начин детето да изгради имунитет. До некаде се во право, но зошто токму лижењето работи и нивното ставање во уста е начин вашето дете, кое веќе не е бебе, да го открива светот околу него?
- Зошто дете ги лиже и ги става работите во уста?
Општо, децата по природа се љубопитни. Лижењето работи и ставањето помали предмети во устата е еден од начините да го запознаат светот околу нив. Додека се многу мали, тие верно ги користат сите свои сетила за што подобро да дознаат што е пред нив. Сакаат да допрат сè, да помирисаат, да го видат, но и да го ставаат во уста. Иако од таквото однесување веројатно ви се крева косата на глава оти размислувате во насока на бактерии, треба да знаете дека таквото однесување не е невообичаено и ќе помине со тек на времето. Со лижење предмети, децата добиваат уникатни сензорни информации за вкусот и текстурата на предметите. Кусо кажано – тоа е детски начин да го разбере светот околу него.
- Дали ваквото однесување е опасно за детето?
Лижењето предмети или ставањето во уста не е опасно само по себе, под претпоставка дека детето е доволно големо и нема да ги проголта. Сепак, на овој начин, детето повеќе доаѓа во контакт со бактерии и нечистотија во неговата околина. Не треба да ги затворате очите пред обидите на вашето дете да го „запознае светот“ на свој начин, ако посегне по нешто што е остро или отровно.
- Како да го натерате детето да се ослободи од таа навика?
Обично кога викате „не го лижи тоа“ или „извади го тоа од уста“, тоа ви носи моментална победа. Сепак, ова не е долгорочно решение. Педијатрите советуваат да ги ангажираат другите сетила на детето кога ќе забележите дека е расположен за истражување. Понудете им кинетички песок, акрилни бои и хартија, музички инструменти или направете мал полигон што можат да го преминат. Исто така, кога сте надвор од дома, обратете му се на детето со зборовите „како на друг начин можеме да го користиме тој предмет, освен што можеме да го ставиме во уста?“. Поттикнете ја имагинацијата кај детето. Освен тоа, секогаш за истражување, можете да му дадете на детето работи кои се јадат.
