Почетокот на новата учебна година во услови на пандемија со КОВИД-19 е голем предизвик. Многу родители, наставници и ученици со доза на напнатост и вознемиреност ја очекуваат оваа необична школска година и, и покрај протоколите и препораките за заштита, истакнуваат дека постојат многу прашања кои и натаму ги мачат.
На некои од прашањата кои најчесто се слушаат во јавноста, одговара епидемиологот д-р Ивана Павиќ-Шиметин, заменик директор на Заводот за јавно здравје во Хрватска.
- Дали децата се изложени на помал ризик од КОВИД-19 во споредба со возрасните?
Д-р Павиќ-Шиметин: Децата се изложени на помал ризик од зараза со новиот коронавирус, а и кога ќе дојде до зараза, многу често немаат симптоми или тие симптоми се многу благи. Кај децата многу ретко и се евидентираат тешки исходи на болеста. Според податоците со кои располага Светската здравствена организација, децата и адолесцентите до 18 години претставуваат само еден до три проценти од пријавените инфекции, иако таа возрасна група чини 29 проценти од светската популација.
- Која е улогата на децата во ширење на коронавирусот?
Д-р Павиќ-Шиметин: Сигурно се знае дека децата не се суперширители како кај грипот. Притоа, често се случува да возрасните лица заразат дете, отколку обратно. СЗО истакнува дека улогата на децата во пренесувањето на заразата се уште не е разјаснета. Затоа во тек се истражувања за да се процени ризикот од инфекција кај децата и за подобро да се разбере која е нивната улога во ширење на заразата.
- Во колкава мера досега во Европа и во светот, училиштата се покажале како жаришта на ширење на КОВИД-19?
Д-р Павиќ-Шиметин: Засега нема примери дека училиштата биле жаришта на заразата, односно извор од кој коронавирусот би се ширел во заедницата. Пред пет дена СЗО одржа вебинар на тема одржување на училишна настава за време на пандемија со КОВИД-19. Учествуваа многу земји и многу стрчњаци. Ниту една земја не пријави дека забележала случај во кој училиштето било извор од кој коронавирусот понатаму се ширел во заедницата. Значи, не сме слушнале за таков пример.
- Што покажуваат досегашните студии, каде децата најчесто се заразуваат?
Д-р Павиќ-Шиметин: Децата најчесто се заразуваат во семејниот дом, и тоа од возрасни лица.
- Очекувате ли дека и покрај епидемиолошките мерки, во училиштата ќе има случаи на зараза?
Д-р Павиќ-Шиметин: Очекувано е да се јават поединечни случаи на зараза кај деца и наставници и затоа мора да се применат мерки на самоизолација кај одредени одделенија. Но, се надеваме дека такви случаи нема да има многу. Затоа е важно во училиштата да не влегуваат возрасни лица или деца кои покажуваат симптоми на зараза или биле во контакт со заразено лице. Исто така, важно е децата да избегнуваат непотребни меѓусебни физички контакти, како што е удирање со дланка, кое за нив претставува она што кај возрасните е ракување.
