Студија спроведена од истражувачи од Универзитетот во Јужна Калифорнија открила дека симптомите на Ковид-19 често започнуваат по одреден редослед. Некои симптоми на Ковид-19, како што се кашлица и треска, се слични на симптомите на некои други болести како што се грип и настинка, па резултатите од оваа студија може да помогнат во разликување на коронавирусот од други болести.
Според студијата, грипот започнува со кашлица, а кај Ковид-19 треската е првиот симптом
„Ова е особено важно да се знае во време кога грипот и Ковид-19 се преклопуваат. Лекарите можат да утврдат кои чекори треба да се преземат за грижа за пациентот и можат да спречат влошување на состојбата на пациентот“, рече д-р Питер Кун, еден од авторите на студијата и професор по медицина.
За да го предвидат редоследот на симптомите, истражувачите ги анализирале стапките на инциденца на симптомите кои ги собрала Светската здравствена организација (СЗО) од над 55.000 пациенти со Ковид-19. Покрај тоа, тие собрале и податоци за луѓе кои имале грип.
Редоследот на симптомите е важен
„Редоследот на симптомите е важен. Ако знаеме дека секоја болест напредува различно, тоа им овозможува на лекарите побрзо да утврдат дали станува збор за Ковид-19 или за некоја друга болест“, рече Џозеф Ларсен, водечки автор на студијата.
Според студијата, симптомите на коронавирус се појавуваат по овој редослед:
- Треска;
- Кашлица и болки во мускулите;
- Гадење или повраќање;
- Дијареја.
„Студијата покажа дека кај пациентите кои имале грип почесто се јавувала кашлица пред треската. Во реалноста, ова може да биде тешко да се препознае затоа што грипот често започнува нагло со три симптоми, вклучувајќи болка во грбот, треска и сува кашлица “, рече д-р Роберт Глатер, лекар во болницата „Ленокс Хил“ во Њујорк.
Глатер рече дека наодите можат да бидат корисни „при проценка на повеќе пациенти во зафатен клинички амбиент“. Според студијата, грипот започнува со кашлица, а кај Ковид-19 треската е првиот симптом, пренесува „Healthline“.
Треба да се напомене дека покрај овие, низа други симптоми се поврзани со коронавирус, како што се губење на вкус и мирис, но треска, кашлица, болки во мускулите, гадење и дијареја често се појавуваат како први знаци на Ковид-19.
