СВЕТСКА НЕДЕЛА НА ДОЕЊЕ. Педијатрите едногласни: Бебето нека цица кога сака и колку сака – тоа е стимулација за стварање на млеко

♦♦♦♦♦♦♦

Доењето е најдобриот, најздравиот, наједноставниот и најевтин начин за хранење на новороденчето. Мајчиното млеко содржи се што му треба на бебето за правилен раст и развој во првите месеци од животот. Честопати се нарекува не само храна, туку и лек, бидејќи содржи антитела, витамини, минерали, вода, хранливи материи, хормони и други фактори, а не содржи штетни бактерии. Одамна е познато дека доењето го подобрува имунитетот на децата и ја намалува можноста за развој на одредени болести подоцна во животот, што е една од неговите најважни придобивки. Токму затоа мајките треба да се охрабруваат да ги дојат своите деца.

„После породувањето млекото од дојката е совршена храна која одговара на потребите на бебето и млекото се менува по својот состав како што се менуваат потребите на бебето. Мајчиното млеко е најоптималниот начин на исхрана не само во првите месеци од животот туку и во цела прва година и подолго“, објаснува д-р Олгица Николовска, специјалист педијатар, потенцирајќи ги предностите на доењето.

„Мајчиното млеко ги содржи сите потребни супстанции за нормален раст и развој на детето со минимално оптеретување на ГИТ и бубрезите. Мајчиното млеко е секрет од млечните жлезди кое се состои од вода и во неа растворени: белковини, масти, јаглехидрати, витамини, минерали и олигоелементи, а исто така, имуни тела, ензими и хормони“.

Светската асоцијација за доење (WABA) ја одбележува Светската недела на доењето (1-7 август) под мотото „Поддршка на родителите за да се одржи доењето“ (Empower parents-enable breastfeeding), со што се потенцира потребата од давање поддршка на семејствата и мајките да го одржат доењето, како и од сите чинители во општеството

Тоа е секогаш достапно, стерилно, со соодветна температура, и се разбира, бесплатно. Со други зборови, идеално. „Освен нутритивните својства на мајчиното млеко уште на почеток треба да се потенцираат имунолошките својства на мајчиното млеко. Имено доеното дете е поотпорно према ентерални и респираторни инфекции и тоа заради некои состојки во својот состав. Така лизозимот во мајчиното млеко предизвикува лиза (распад) на грам позитивни и грам негативни бактерии, лактоферинот делува бактериостатски на coli бактерии, линолна киселина, имуноглобулини ИгГ и ИгМ учествуваат во одбрана на организмот, ИгА штити ГИТ, макрофагите продуцираат комплемент Ц3 И Ц4, а сите заедно претставуваат пасивен имунитет кој се предава од мајката на бебето и овозможува имун одговор на сите надворешни нокси и влијанија“, вели д-р Николовска, додавајќи дека треба да се имаат предвид и емоционалните придобивки од доењето, чуството на заштитеност, љубов и континуирана социјална стимулација што е основа за здрав психички развој во натамошниот живот.

Светската асоцијација за доење (WABA) оваа година ја одбележува Светската недела на доењето (1-7 август) под мотото „Поддршка на родителите за да се одржи доењето“ (Empower parents-enable breastfeeding), со што се потенцира потребата од давање поддршка на семејствата и мајките да го одржат доењето, како и од сите чинители во општеството. Со цел доењето да биде успешно, на мајките им е потребна континуирана поддршка во сите фази од мајчинството, почнувајќи од претконцепцискиот период, во текот на бременоста и особено по породувањето, вклучително и на работното место.

Меѓу останатите придобивки од доењето, прим. д-р Ферит Муча, педијатар ја нагласува и неговата улога во однос на превенцијата на алергија кај децата. „За да го намалите ризикот од појава на алергија на храна кај децата треба бебето да се дои што подолго, барем во првите 6-12 месеци. Ексклузивното доење ја редуцира алергијата“.

Мајчиното млеко е секогаш достапно, стерилно, со соодветна температура, и се разбира, бесплатно. Со други зборови, идеално

Ексклузивно доење подразбира исхрана само со мајчино млеко во првите 6 месеци, без додавање на друга храна или течности. Мајчиното млеко овозможува заштита на децата од инфекции и болести. „Ексклузивното доење е нешто најдобро што може да му дадете на своето дете. Ексклузивното доење се препорачува до крајот на 5. месец, но по најновите препораки потребата за воведување на дохраната се препорачува да се започне од 16 до 20 недела според проценка на педијатарот и е индивидуално за секое дете“, вели д-р Македонка Глигорова, педијатар.

Голем број на мајки се соочуваат со дилемата дали нивното млеко е слабо или добро, квалитетно. Што вели прим. д-р Лидија Спасова, педијатар-неонатолог на оваа тема? „Квалитетно млеко е секое мајчино млеко. Што е разликата од една до друга доилка? Тие се разликуваат во количината на млекото, а не во квалитетот! Стимулацијата за стварање на млеко е што почесто бебето да се става на града, затоа советот којшто го даваме е слободно доење. Што значи тоа? Слободно доење значи: каде што сака детето, колку што сака и кога сака. Без ограничување, без гледање на часовник, нема потреба да биде стриктно на два или три часа или да се буди ноќе за цицање. Кога сака, колку сака и каде сака, доењето нека биде на барање на бебето. Често им велам на мајките, ако им бара бебето да цица и на 15 мин. – да му даваат и на 15 мин.!“

Доењето е најдобриот начин на исхрана на доенчињата, ја поставува основата за добро здравје не само во периодот на детството, туку и во адултната возраст, воедно носи и голем број бенефити за мајките и за општеството во целост придонесувајќи кон остварување на сите 17 цели за одржлив развој на ОН. Во согласност со препораките на Светската здравствена организација (СЗО) доењето треба да е екслузивно во првите 6 месеци од животот, да трае до 2 години и подолго, паралелно со воведување други видови храна по 6-от месец.

Во водичот за родители, подготвен од Здружението на сестри и акушерки, а со поддршка на УНИЦЕФ, се објаснети знаците кои можете да ги препознаете, а кои ќе ви помогнат да се уверите дека доењето е успешно:

1. Во првите недели по породувањето бебињата бараат да цицаат 8-12 пати во текот на 24 часа;
2. Почнувајќи од четвртиот ден по породувањето, бебињата имаат 5-6 добро натопени со урина пелени во текот на 24 часа;
3. Од четвртиот ден па приближно до 6 недели по породувањето, имаат најмалку 3-4 светло жолти столици во тек на 24 часа. Покасно се намалува нивниот број;
4. Брадавките и градите не ве болат додека го доите детето;
5. Цицањето на детето може да го осетите со ритам од 1 повлекување во секунда;
6. Голтањето на детето е гласно и вие може да го слушнете;
7. Вашето дете цица од едната града се додека само не ја отпушти брадавката. После мал одмор можете да му ја понудите и другата града;
8. Вашите гради се меки по завршување на подојот;
9. Вашето дете изгледа задоволно по завршување на подојот;
10. Во текот на следните 1- 2 недели вашето дете ја враќа родилната тежина која ја изгубило по породувањето.

(К.Ш.Д.)