Кога детето е болно, родителите се загрижени и внимаваат на секој симптом. Сепак, еден помалку познат знак на исцрпеност и дехидрација може да се препознае токму со помош на сетилото за мирис. Педијатарот од Корк, Ирска, д-р Нијам Линч, споделува корисни совети за родителите чие дете е болно. Таа истакнува дека сетилото за мирис може да игра клучна улога во препознавањето на знаците на замор и дехидрација.
Д-р Линч на својот Инстаграм профил сподели едноставен, но ефикасен совет: ако детето остане без доволно калории или течности, телото може многу брзо да влезе во состојба на кетоза.
„Кога тоа ќе се случи, здивот на детето добива многу специфичен мирис – поточно мирис сличен на ацетон (отстранувач на лак за нокти)“, објасни д-р Линч. Таа додаде дека овој мирис е знак дека треба да побарате лекарска помош. Исто така предупреди дека истиот мирис може да укажува и на дијабетична кетоацидоза, сериозна и потенцијално опасна компликација на дијабетесот.
Во описот на нејзината објава, таа дополнително појасни: „Ако го осетите мирисот на ацетон во здивот на вашето дете, тоа може да значи дека преминало во кетоза поради намалениот внес на храна и пијалаци“.
„Некои деца многу лесно влегуваат во кетоза, па може да ја забележите оваа шема секогаш кога ќе се разболат. Меѓутоа, ако го забележите мирисот за прв пат или го забележите во комбинација со други симптоми како што се постојана треска, знаци на дехидрација, осип, сериозно повраќање, намалена свест или раздразливост, веднаш побарајте лекарска помош“, додаде таа.
Овој мирис е знак дека треба да побарате лекарска помош. Истиот мирис може да укажува и на дијабетична кетоацидоза, сериозна и потенцијално опасна компликација на дијабетесот
Д-р Линч нагласува дека кетозата често се јавува кај деца со дијабетес тип 1, а лошиот здив може да биде првиот симптом кој родителите го забележуваат при поставувањето на дијагнозата.
Родителите и следбениците на социјалните мрежи беа изненадени од ова откритие, а многумина споделија свои искуства. „Леле, не го знаев ова! напиша еден корисник. „Најдоброто видео досега. Ми помогна кога син ми беше навистина болен“, сподели друг родител. Трет се присети на времето кога лекарите честопати ги посетувале дома: „Во 1989 година, нашиот лекар влезе во куќата, го намириса воздухот и веднаш не испрати во болница бидејќи нашиот син беше дехидриран“.
Знаци и симптоми на дехидрација кај дете
Педијатрите тврдат дека симптомите на дехидрација не се секогаш лесни да се препознаат, а последиците од тешката дехидрација можат да бидат многу сериозни и опасни. Ако детето е благо дехидрирано, може да ги доживее овие симптоми:
- вртоглавица,
- зашеметеност,
- гадење или главоболка,
- темножолта или кафеава урина,
- помалку влажни пелени или пелени кои не се влажни како обично,
- помала потреба за мокрење,
- суви усни, јазик, уста или грло.
Ако детето е веќе сериозно дехидрирано, може да биде многу жедно, летаргично или помалку активно од вообичаено, бледо, да има насолзени очи, ладни раце или нозе, забрзано да дише и да има забрзано чукање на срцето, да биде раздразливо, поспано или збунето. Педијатрите предупредуваат дека родителите треба веднаш да побараат помош доколку ги забележат овие знаци на сериозна дехидрација кај своето дете.
Знаци на дехидрација кај бебиња
Дехидрација настанува кога телото губи повеќе течност отколку што внесува. Знаци на дехидрација кај бебето се:
- Вдлабната/мека фонтанела на главата, т.е. големата фонтанела е повлечена под нивото на околното коскено ткиво.
- Јазикот е сув, кај тешка дехидрација и обложен со белузлави наслаги, се лепи за непцето.
- Вкупната количина на урина е намалена, помалку влажни пелени од вообичаено.
- Урината е концентрирана и интензивно обоена.
- Имаат малку или воопшто немаат солзи кога плачат.
- Пулсот е послаб.
- Поспаност.
