ПИШУВА:
Катерина Шекеровска-Димовска
katerina@pedijatar.mk
Атрактивни теми, конструктивни дискусии и сесии, учество и предавања на врвни професионалци од земјата и странство, внимателно подготвени работилници и сето тоа во прекрасна атмосфера со полни сали, го одбележаа 6. Конгрес и 26. Симпозиум со меѓународно учество на Здружението на лекари по општа-семејна медицина (ЗЛОМ-СМ), што се одржа викендов (15-18 мај), во хотелот „DoubleTree by Hilton“ во Скопје.
Вниманието и интересот за сесиите сведочат за квалитетната содржина што ја понуди 6. Конгрес и 26. Симпозиум на ЗЛОМ-СМ. Првите впечатоци по завршување на овој значаен стручен настан ни ги сподели д-р сци. Драган Ѓорѓиевски, претседател на Здружението на лекари по општа-семејна медицина (ЗЛОМ-СМ) и потпретседател на Европската унија на семејни лекари – УЕМО.
Семејните лекари се столбот на здравствената заштита, од нас сè почнува и сè завршува со нас. ЗЛОМ-СМ покажа дека е лидер во организирање на конгреси и симпозиуми како дел од континуираната медицинска едукација
„6. Конгрес и 26. Симпозиум со меѓународно учество на Здружението на лекари по општа-семејна медицина (ЗЛОМ-СМ) поминаа во прекрасна атмосфера, конгрес на кој покрај тоа што се разменија искуства меѓу учесниците, беше и совршен спој на дружба. Особено ме радува фактот што многу млади колеги земаа учество на нашиот конгрес, а дел од нив имаа и свои излагања на истиот“, истакна првиот човек на ЗЛОМ-СМ, д-р сци. Драган Ѓорѓиевски.
Конгресот имаше богата и прецизно подготвена програма, распоредена во четири денови, посветени на „Дијагноза и превенција во семејната медицина – патоказ кон иднината“. Во склоп на конгресот се одржа и симпозиумот „Силата во рацете на семејните лекари“, а посветен на сексуално преносливите инфекции.
„На Конгресот имаше регистрирано околу 450 учесници, 20 европски професори и 10 македонски професори, како и голем број на семејни доктори, кои одржаа предавања распределени во четиринаесет сесии за ризик фактори, скрининг и превенција, дијабет, хипертензија со хиперлипидемија, ХОББ, АСТМА, БПХ, антибиотици, ревматолошки заболувања, мултиморбидитети, стари лица и полифармација, како и слободни теми и постер презентации. Беа презентирани 61 орална презентација и 31 постер презентација. Учество земаа преку 35 фармацевтски компании, дел од нив имаа 17 сателитски симпозиуми. Конгресот имаше и четири работилници: ехо дијагностика, интраартикуларна апликација, педијатриско одржување на живот и спирометрија“, објаснува д-р сци. Ѓорѓиевски.
Во рамките на одржувањето на 6. Конгрес и 26. Симпозиум на ЗЛОМ-СМ, беше одбележан и 19 Мај – Светскиот ден на семејните лекари. Станува збор за глобален настан за препознавање на клучната улога што ја имаат матичните лекари и тимовите од примарната здравствена заштита во здравствените системи ширум светот. Овој годишен настан, воспоставен од WONCA во 2010 година, ги слави суштинските придонеси на матичните лекари во обезбедување персонализирана, сеопфатна и континуирана грижа за пациентите и заедниците.
Особено значајно беше што на конгресот во Скопје присуствуваше и претседателот на Европската унија на семејни лекари д-р Тијаго Виланува (Португалија), кој одржа предавање на тема: „Предизвици во семејната медицина. Како може UEMO да помогне за подобра пракса?“
„Одбележувањето на Денот на семејниот лекар – 19 Мај беше под мотото „Градење на ментална отпорност во промена на светот“, а истиот беше одбележан во склоп на конгресот со делење на чоколатца со логото и мотото на Денот за да им се честита денот на семејните лекари“, вели д-р сци. Ѓорѓиевски.
На Конгресот имаше регистрирано околу 450 учесници, 20 европски професори и 10 македонски професори, како и голем број на семејни доктори, кои одржаа предавања распределени во четиринаесет сесии за ризик фактори, скрининг и превенција, дијабет, хипертензија со хиперлипидемија, ХОББ, АСТМА, БПХ, антибиотици, ревматолошки заболувања, мултиморбидитети, стари лица и полифармација, како и слободни теми и постер презентации. Беа презентирани 61 орална презентација и 31 постер презентација. Учество земаа преку 35 фармацевтски компании, дел од нив имаа 17 сателитски симпозиуми. Конгресот имаше и четири работилници: ехо дијагностика, интраартикуларна апликација, педијатриско одржување на живот и спирометрија
Особено значајно беше што на конгресот во Скопје присуствуваше и претседателот на Европската унија на семејни лекари д-р Тијаго Виланува, (Португалија), кој одржа предавање на тема: „Предизвици во семејната медицина. Како може УЕМО да помогне за подобра практика?“
На конгресот беа доделени и награди за прво, второ и трето место во постер сесиите како и во слободните теми. Првото место во постер сесијата и припадна на д-р Христина Лескаровска со нејзината тема „Пушењето и неговото влијание врз кардиоваскуларниот ризик“, второто место и беше доделено на д-р Селма Рустеми со нејзината тема „Палијативна нега и хоспис грижа“, додека третото место во постер сесиите и припадна на д-р Катерина Дамевска за „Предизвици во лекување на секундарна анемија“.
Во слободните теми првото место му припадна на д-р Мартин Анѓелов со неговата тема „Приказ на редок случај СССС кај новородено старо два дена“, второто место го поделија д-р Христина Лескаровска и д-р Билјана Чекорова Митрова, а третото место им припадна на д-р Билјана Јордановска и д-р Емилија Крстевска.
Во рамките на одржувањето на 6. Конгрес и 26. Симпозиум на ЗЛОМ-СМ, беше одбележан и 19 Мај – Светскиот ден на семејните лекари
„Оваа година за првпат беа доделени награди за најдобри тројца предавачи во рамките на целиот конгрес и истите им припаднаа на д-р Јурај Југ (Хрватска), проф д-р Весна Пеќаревиќ-Џакулин (Словенија) и проф д-р Љубомир Киров (Бугарија)“, истакна д-р сци. Ѓорѓиевски.
По завршувањето на четиридневниот стручен собир на семејните лекари е јасно дека континуираната медицинска едукација е повеќе од неопходна. „Со внимателно одбрана програма конгресот имаше одлична посетеност на сите сесии, а задоволните лица на партиципантите покажаа дека целта е постигната. Семејните лекари се столбот на здравствената заштита, од нас сè почнува и сè завршува со нас. ЗЛОМ-СМ покажа дека е лидер во организирање на конгреси и симпозиуми како дел од континуираната медицинска едукација“, истакна д-р сци. Ѓорѓиевски, прв човек на ЗЛОМ-СМ.
Коментарите на присутните се исклучително позитивни, задоволни се сите и едногласни дека целокупната организација беше на светско ниво. Уште долго ќе се зборува за 6. Конгрес и 26. Симпозиум со меѓународно учество на (ЗЛОМ-СМ), кој навистина ги помести границите покажувајќи дека и во Македонија може да се организираат настани од ваков тип на највисоко професионално ниво.
