За време на оваа недела, продолжува развојот на мозокот, како и развојот на сетилото за допир, кое е прво сетило кое созрева, а преку него, бебето учи за своето тело: како се движат екстремитетите, каде се наоѓаат различни делови од телото и во каков меѓусебен сооднос се.
Вашето бебе може да го опипа своето лице и да удира со рачињата и нозете. Сега може да се разликуваат периоди на активност и сон на бебето.
Бебето е долго од 25-30 сантиметри, а тешко околу 380-420 грама.
Ова е период кога физиолошката анемија е најизразена: за време на бременоста доаѓа до зголемување на количината на циркулирачката крв, така што волуменот на течниот дел (плазма) се зголемува за 30%, додека волуменот на крвните клетки се зголемува за 25%, поради што доаѓа до појава на физиолошко разредување на крвта – анемија во бременоста.
Иако, физиолошката анемија е природна појава, во договор со матичниот гинеколог, недостатокот на железо треба да се надомести.
Многу ретка, но многу сериозна инфекција во бременоста е токсоплазмозата. Причинителот за оваа инфекција е токсоплазма – паразит кој на луѓето се пренесува преку измет на мачка, како и преку внес на недоволно сварено или печено месо, но и од недобро измиено овошје или зеленчук.
Кај помалку од 50% од трудниците во случај на инфекција се јавуваат само благи симптоми слични на грип, како благо покачена телесна температура, општа слабост, болки во мускулите, пролив, малаксалост…
