Болките главно се последица на подготовката на телото за породување – под влијание на хормонот релаксин кој пред се ги омекнува зглобовите на карлицата за бебето да може да помине низ родилниот канал. Но, неговиот ефект се чувствува и на сите останати зглобови, така што се случува некои од нив да почнат да отекуваат од “нигде никаде“.
Друг фактор кој неповолно влијае е зголемената телесна тежина која ги оптоварува колковите, колената и стапалата – при долго стоење или пешачење. Големината и положбата на стомакот исто така допринесува за појави на болки, бидејќи ја менуваат постоечката статика на телото и наметнуваат нови положби, кои понекогаш може да доведат до појава на болки.
Доколку жената има некои од развојните деформитети на коскено-зглобниот систем (кифоза, сколиоза, рамни стапала, или во детството има целосно или делумно исчашување на колковите), во бременоста е под поголем ризик од појава на болки во еден или во повеќе зглобови. Овие деформитети за последица имаат неправилно држење – една група на мускули која е скратена, додека друга група која е ослабена, па со бременоста и промените кои таа ги носи, сето ова саму уште повеќе се нагласува.
Лицата со сколиоза во стоечка положба главно ја оптоваруваат едната нога. Во бременоста тоа е значајно поголема тежина, па неретко поради тоа, жената почнува да ја боли колкот, коленото или стапалото од таа страна.
Наведените деформитети не може да се корегираат по завршување на растот. Поради тоа, најдобар начин да се избегнат сите непроијатности во бременоста до кои тие доведуваат – доволно силни мускули кои ќе издржат дополнително оптоварување, корегирана положба која треба за се зазема при седење, стоење или одење, како и заштитни движења при дополнително оптоварување (носење товар, влегување во када, подигање на постарото дете, извршување на домашни работи).
