Д-р Ентони Фаучи, директор на Националниот институт за алергија и инфективни болести, вели дека долготрајните симптоми на COVID-19 траат многу подолго отколку оние кај другите вирусни инфекции, како што е, на пример, грипот.
Околу 30 проценти од пациентите со COVID-19 имаат долготрајни симптоми како што се замор, отежнато дишење, болки во мускулите или нарушувања на спиењето.
„Ние со сигурност знаеме дека постои пост-COVID-19 синдром, кој исто така се нарекува и продолжен COVID“, рече Фаучи.
Нејасно е колку точно можат да траат симптомите, бидејќи вирусот е откриен пред помалку од една година, но Фаучи вели дека симптомите се забележуваат со месеци и месеци по првичната инфекција, пишува Си-Ен-Ен.
Фаучи, исто така, изјави дека здравствените работници треба да бидат горди на работата што ја завршиле во изминатите неколку месеци затоа што „навистина ги ризикуваа своите животи и својата безбедност“ со континуираната грижа за луѓето кои се разболеа од болеста, која во некои случаи завршува и со смрт.
Факт е дека помладите луѓе сега повеќе се заразуваат
На прашањето зошто расте бројот на заразени луѓе низ целиот свет, а стапката на смртност се намалува, Фаучи вели дека стапката на смртност кај COVID-19 опаѓа како резултат на три фактори: „возраста, искуството и подобрите лекови“.
„Стануваме подобри во лекувањето на луѓето. Имаме и повеќе искуство. Вие сега знаете што делува. Постојат третмани што можат да им помогнат на луѓето, како што се дексаметазон и ремдесивир“, рече Фаучи, додавајќи дека е познато и кои нефармаколошки приоди не функционираат.
„Факт е дека помладите луѓе сега повеќе се заразуваат, но не умираат. Тоа е, исто така, е еден од факторите што ја намалуваат стапката на смртност“, заклучува Фаучи. (Си-Ен-Ен)
