Укор и дисциплина – овие зборови звучат толку уредно и толку безопасно, што воопшто нема сомнеж дека тоа мораме да го направиме токму тогаш кога ќе се случи. Сепак, тоа прекорување и дисциплинирање најчесто звучи како – викање и закани. Не треба да се срамите од тоа, не сме ве виделе како викате по децата во јавност. Едноставно, работата е во тоа дека често во теорија сите знаеме едно, а во пракса правиме нешто сосема друго. Па, не е баш лесно да се најде вистинскиот начин да се реагира кога дете ќе лежи на под среде трговски центар и ќе почне да вреска затоа што не добило сок… Се е јасно.
Реакцијата на ваква ситуација често зависи од расположението на родителите, од интензитетот на тантрумот, моментот пред него, замор, брзање… се! Некогаш реагираме премногу бурно, па подоцна се каеме, а понекогаш ни се чини дека сме направиле се само за да тоа го „средиме“ што потивко и што помирно.
Дали всушност воопшто треба да го укориме детето јавно и како тоа да го направиме на ефективен, но не претерано бурен начин? Можеби некои од овие совети подолу ќе ви помогнат. За почеток, одговорот на прашањето дали воопшто треба да го дисциплинирате детето во јавност е – да. Но на вистински начин.
Дисциплинирањето на јавно место, се разбира, не значи викање, карање, понижување или засрамување на детето. Да се разбереме – не треба да биде така ниту во јавност, ниту во приватноста на домот! Дисциплината вклучува образование и учење, кое започнува долго пред да јавно излегување. Станува збор за тоа да ги натерате да ги следат правилата кои се познати и договорени однапред.
Клучеви за дисциплинирање на детето во јавност
Еве неколку совети за позитивна интервенција кога вашето дете лошо се однесува во јавност.
Обидете се да се спуштите на нивото на детето
Ако се работи за мало дете, еден од начините да му го привлечете вниманието е да се спуштите на негово ниво. Тоа е како да се обидувате да создадете ситуација еден на еден, наместо да изгледа како некој „надреден“ издава наредби. Наведнете се, погледнете го детето во очи и објаснете му дека тоа што го прави е непримерно и кажете му зошто тоа не треба да се прави.
Запомнете ги правилата
Кога однапред ќе поставите ограничувања, можете да му укажете на вашето дете за што сте се договориле и кои се последиците од непочитувањето. Не очекувајте детето да знае дека прави нешто погрешно без претходно да му објасните.
Зборувајте на мирен, но цврст начин
Не е потребно викање за да се постигне почитување. Топлата поврзаност и многу љубов создаваат многу подобар контекст за учење. Дополнително, ако му викате или го понижувате вашето дете, можете да создадете ситуација на која вашето дете во иднина може да гледа како на многу лошо искуство.
Прашајте што им треба и сочувствувајте
Кога му помагате на детето да препознае што не е во ред, му го давате клучот за она што му треба. Откако ќе дознаете, покажете дека разбирате и предложете алтернативен план. На пример, ако вашето дете сака газиран сок, но вие не му дозволувате да го пие, можете да кажете: „Разбирам дека сакаш сок, но запомни дека обично не пиеме сокови во текот на неделата. Како би било таа желба да ја запишеме на парче хартија за да можеме да ја исполниме за викенд?“.
