Губењето на вкусот и мирисот е еден од клучните симптоми кои укажуваат на COVID-19, но постои уште еден сроден симптом кој исто така може да послужи како знак на предупредување.
Според „Вашингтон пост“, многу пациенти со COVID-19 имаат „искривено“ чувство за вкус или мирис; тие не го изгубиле во потполност, туку чувството им е променето. Овој симптом се нарекува паросмија, дисфункција на детекција на мирис што исто така може да влијае на способноста на лицето да ја обработи перцепцијата на аромата – и се чини дека е изненадувачки доминантен кај пациенти со COVID-19.
Џенифер Спајсер, лекарка за инфективни болести на Медицинскиот факултет на Универзитетот Емори во Атланта, го сподели своето искуство со паросмија преку пост откако се опорави од COVID-19 во јули.
„Мислев дека сум се опоравила“, напиша таа. Но, неколку месеци подоцна, во октомври, Спајсер пиела црвено вино и забележала дека нејзиниот пијалак е како бензин. Кафето имало ист вкус, а Спајсер исто така наведува дека месото имало расипан вкус.
Се испоставило дека многу луѓе заболени од COVID-19 ја имале оваа состојба, односно многу од нив навеле дека нивната храна и пијалаци имаат вкус на бензин или мирис на гниење. Друга жена во изјава за Би-Би-Си вели дека откако се разболела од COVID-19 „месото има вкус на бензин“. И други заболени изјавиле исто така дека нивната храна има вкус на нешто расипано, а виното има вкус на нафта.
Но, покрај COVID-19, и други работи можат да влијаат на вашите сетила. Проблеми со забите, недостатоци во исхраната, алергии и синусни инфекции исто така може да предизвикаат промени во сетилата за вкус и мирис.
