Прекумерна телесна тежина или обезност, депресија, висок крвен притисок (хипертензија) и астма се само некои од хроничните здравствени состојби кои погаѓаат 40 милиони Американци на возраст помеѓу 18 и 34 години, укажуваат новите податоци на Центарот за контрола и превенција на болести на САД (ЦДЦ).
Севкупно, податоците од 2019 година покажуваат дека повеќе од половина од младите возрасни (речиси 54%) сега имаат барем еден хроничен здравствен проблем. Речиси секое четврто младо возрасно лице (22%) има две или повеќе од овие состојби.
Најчести состојби биле обезноста (25,5%), депресијата (21,3%) и високиот крвен притисок (10,7%). Високото ниво на холестерол влијае на околу 10% од возрасните под 35 години, астмата погаѓа над 9%, а околу 6% имаат артритис, покажало истражувањето.
Исто така, се покажало дека младите возрасни со хронична болест имаат поголема веројатност да пријават прекумерно пиење, пушење или физичка неактивност отколку оние без некакво заболување.
Бидејќи хроничните состојби стануваат се поприсутни со возраста, фокусот на превенцијата и ризик факторите е клучен за здравјето во текот на целиот животен век, истакнуваат експертите во својот извештај Morbidity and Mortality Weekly Report.
