Сувоста на вагината по породувањето е проблем со кој се соочуваат многу жени. Во студија од 2018 година, на примерок од 832 жени, 43 проценти од нив пријавиле сувост на вагината како една од промените по породувањето. Иако се уште станува збор за табу тема, важно е да се знае дека не е сериозна компликација по породувањето, туку вообичаена појава која следи по закрепнувањето на телото и во повеќето случаи поминува сама по себе без некоја сериозна терапија.
Жените кои имаат проблем со сувост на вагината најчесто се жалат на:
- Пецкање – губење на еластицитетот
- Иритација – чувствителност во вагиналното подрачје
- Болни или непријатни сексуални односи
- Крварење во текот на односот
- Непријатност за време на физичка активност
- Чести уринарни инфекции и често мокрење
Сувоста најчесто е предизвикана од фактот што вагиналното ткиво се намалува, станува помалку еластично и е поподложно на оштетување. Хормоните играат голема улога во тоа, особено естрогенот, бидејќи тој е од витално значење за либидото и има најголемо влијание врз протокот на крв во гениталиите и “подмачкување“ на вагината.
Доколку забележите дека постпородилните симптоми траат подолго и ви го попречуваат секојдневното функционирање, ако болката е неподнослива или ако сте загрижени на кој било начин, задолжително консултирајте се со вашиот гинеколог. Лекарот може да ви даде соодветна терапија или да изврши преглед за да се исклучи секое сомневање за инфекција.
Како да се спречи сувост на вагината?
- Хидратацијата е важна за целото тело, вклучувајќи ја и вагиналната област.
- Избегнувајте агресивни сапуни и купки бидејќи средствата за миење кои не се наменети за интимниот дел имаат поголема pH вредност и може да доведат до иритација и сувост на вагината. Користете благи купки, со соодветен состав и ниска pH вредност.
- Престанете да пушите бидејќи слободните радикали внесени од чадот од цигарите во телото предизвикуваат оксидативен стрес во сите наши клетки.
- Зајакнување на карличните мускули со Кегелови вежби. Исто така, овие вежби доведуваат до подобра циркулација и снабдување со крв во интимната зона и го негуваат мускулниот тонус на вагиналниот ѕид.
- Предиграта за време на сексот е важна бидејќи го поттикнува физиолошкото навлажнување на вагината.
- Користете орални вагинални пробиотици кои придонесуваат за одржување на здрава вагинална флора-микробиота, ја одржуваат оптималната pH вредност на вагината и спречуваат уринарни и вагинални инфекции.
