Водечките експерти за детско здравје алармираат поради намаленото користење на рутински вакцини за детството, откако новите пресметки покажаа дека десетици милиони пропуштиле вакцини кои спасуваат животи во последниве години.
УНИЦЕФ пресметал дека помеѓу 2019 и 2021 година, околу 67 милиони деца ширум светот не примиле рутински вакцини, кои можат да заштитат од потенцијално фатални болести.
Меѓународното тело на ОН за деца рече дека севкупната поддршка за вакцините останува „релативно силна“, но неколку фактори сугерираат дека „заканата од двоумење за вакцините може да расте“.
Не можеме да дозволиме довербата во рутинската имунизација да стане уште една жртва на пандемијата, инаку следниот бран на смртни случаи може да ги покоси децата со сипаници, дифтерија или други болести кои можат да се спречат
Овие фактори вклучуваат несигурност во врска со одговорот на пандемијата, зголемување на пристапот до дезинформации, опаѓање на довербата во стручноста и политичката поларизација, се наведува во новиот извештај на УНИЦЕФ.
„Во екот на пандемијата, научниците брзо развија вакцини кои спасија многу животи. Но, и покрај ова историско достигнување, стравот и дезинформациите за сите видови вакцини циркулираа подеднакво колку и самиот вирус“, рече извршната директорка на УНИЦЕФ Кетрин Расел.
„Не можеме да дозволиме довербата во рутинската имунизација да стане уште една жртва на пандемијата, инаку следниот бран на смртни случаи може да ги покоси децата со сипаници, дифтерија или други болести кои можат да се спречат“.
Од УНИЦЕФ порачуваат итно да се реши проблемот со децата кои пропуштиле вакцини за да се „спречи појавата на смртоносни болести“.
