Се зголемува бројот на заболени од грип во земјава. Според податоците на ИЈЗ, во текот на втората недела од 2025 година (06-12.01.2025), во земјава се пријавени 1.053 случаи на заболени од грип/заболувања слични на грип, што е за трипати повеќе во споредба со претходната недела.
За прв пат оваа сезона, пријавената инциденца е над неделната граница на сезонската активност на вирусот на грип (I=26,12/100.000), односно надминат е прагот на влез во сезоната на грип. Во однос на возрасната дистрибуција, 633 лица се на возраст од 15-64 години, 179 кај деца на возраст од 5-14 години, 144 кај деца на возраст од 0-4 години и 97 се регистрирани кај лица на возраст над 65 години. Највисока инциденца (149,2/100.000) се регистрира кај децата на возраст од 0-4 години, а кај децата од 5-14 години инциденцата изнесува 83,3/100.00. Најмногу заболени се пријавени во Скопје – 305, следува Дебар – 134, Куманово – 118, Тетово и Гостивар – по 66, Кавадарци – 62, а во останатите, бројот на заболени е ≤50.
Симптоми на грип кај децата
Грипот кај децата е респираторно заболување предизвикано од вирусот на инфлуенца, кое може да варира од блага до тешка форма. Децата се меѓу најпогодените возрасни групи, бидејќи нивниот имунолошки систем сè уште не е целосно развиен, што ги прави поподложни на инфекција и компликации. Кај децата, симптомите на грип може да се појават ненадејно и вклучуваат:
- Висока температура (често над 38°C).
- Кашлица, која може да биде сува или продуктивна.
- Болки во грлото.
- Мускулни болки и слабост.
- Главоболка.
- Замор и исцрпеност.
- Насолзени очи и чувствителност на светлина.
- Повраќање, дијареја и болки во стомакот (почести кај помали деца).
Децата се меѓу најпогодените возрасни групи, бидејќи нивниот имунолошки систем сè уште не е целосно развиен, што ги прави поподложни на инфекција и компликации
Ризик од компликации
Грипот кај децата се пренесува преку капки кои се испуштаат при кашлање, кивање или зборување, а може да се пренесе и преку контакт со контаминирани предмети, како играчки или површини. Иако повеќето деца закрепнуваат за 1-2 недели, кај некои може да се развијат компликации, како што се инфекции на ушите, бактериски синузитис, бронхитис или пневмонија, дехидрација поради губење на течности од повраќање или дијареа, влошување на хронични состојби, како што се астма или дијабетес.
Кога да побарате лекарска помош
Важно е родителите да се консултираат со педијатар доколку забележат:
- Потешкотии со дишењето.
- Температура што трае повеќе од три дена.
- Силна летаргија или раздразливост.
- Сини или бледи усни и кожа.
- Проблеми со хранење или пиење течности.
- Симптоми кои укажуваат на дехидрација, како што се суви усни, намалено мокрење (помалку од 3 мокрења дневно кај малите деца) или суви очи без солзи при плачење.
- Постепено влошување на состојбата, и покрај домашното лекување.
Превенција
Вакцинација: Најефикасната мерка за спречување на грип кај децата е годишната вакцина против грип, препорачана за сите деца над 6 месеци.
Хигиенски мерки: Редовно миење раце, избегнување контакт со болни лица, и учење на децата да киваат или кашлаат во свиткан лакт.
Засилување на имунитетот: Балансирана исхрана, доволно сон и физичка активност можат да помогнат во зајакнување на имунолошкиот систем.
Досега се вакцинирани 72.318 лица со вакцина против грип
Вакцинацијата против сезонски грип е најефикасната заштита од ова заболување. Институтот за јавно здравје препорачува вакцинација на целото население, особено на лица кои припаѓаат на т.н. ризични групи (согласно препораките на СЗО): постарите лица (над 65 години), деца на возраст од 6-59 месеци, лица постари од 6 месеци со хронични болести, бремени жени и здравствени работници. Оттаму истакнуваат дека од почетокот на вакцинацијата заклучно со втората недела во 2025, во земјава се вакцинирани вкупно 72.318 лица со бесплатна или комерцијална вакцина.
