Целосно вакцинираните луѓе во Англија имале три пати помала веројатност да бидат позитивни на Ковид-19 во однос на невакцинираните луѓе, според британското истражување објавено во средата.
Станува збор за студија на научниците од лондонскиот Империјал колеџ спроведена на 98.233 тестови за коронавирус во периодот помеѓу 24 јуни и 12 јули.
Двојната доза на вакцина обезбедува добра заштита против инфекција. Сепак се уште постои ризик од инфекција, бидејќи ниту една вакцина не е 100 проценти ефикасна
Вкупно 0,63 проценти од тестовите биле позитивни (или 1 од 158), при што процентот на позитивни кај невакцинираните изнесувал 1,21 проценти, а кај целосно вакцинираните 0,4 проценти.
Во студијата, исто така, се истакнува дека резултатите покажуваат помала веројатност вакцинираните луѓе да го пренесат вирусот за разлика од вакцинираните луѓе, бидејќи количината на вирус во нивниот организам е помала.
Сепак, дел од британските претставници и научници повикаа на претпазливост, откако владата ги олесни сите рестриктивни мерки на 19 јули, вклучително и укинување на задолжителното носење маски во одредени затворени простории.
Документ на американската влада кој протече минатата недела предупредува дека инфекциите кај целосно вакцинираните луѓе не се толку ретки како што се мислеше и дека вакцинираните луѓе лесно го пренесуваат вирусот.
- Пол Елиот, професор во Одделот за јавно здравје на Империјал колеџ и директор за истражување, рече дека резултатите „ги потврдуваат нашите претходни податоци кои покажуваат дека двојната доза на вакцина обезбедува добра заштита против инфекција“
„Сепак, исто така можеме да видиме дека се уште постои ризик од инфекција, бидејќи ниту една вакцина не е 100 проценти ефикасна, и знаеме дека некои луѓе кои се двоструко вакцинирани се уште можат да се разболат од вирусот“, рече тој.
„Значи, дури и со олеснување на ограничувањата, сепак треба да дејствуваме внимателно за да се заштитиме едни со други и да ја спречиме стапката на инфекции“, додаде тој.
Бројот на дневни случаи во Велика Британија регистрирани од Министерството за здравство на Обединетото Кралство е намален по олабавување на мерките.
Овој тренд ги изненади експертите кои предвидоа големо зголемување на бројот на заразени.
