Италија повторно воведе мерка за оценување на однесувањето на учениците бидејќи расте загриженоста за агресијата насочена кон наставниците.
Таканаречената оценка за владеење е слична на мерката што првпат ја воведе владата на Бенито Мусолини во 1924 година, а е дел од предлог законот за образование што го усвои парламентот во средата. Така, училиштата добија овластувања да ги оценуваат учениците исклучиво врз основа на нивното однесување, пренесува The Guardian.
Овие оценки во голема мера ќе влијаат на полагањето на матурата, а учениците кои немаат задоволителна оценка во владеење ќе мора да го повторат одделението, односно класот. Оние кои се на граница ќе треба да полагаат тест за граѓанско образование. Воведени се и казни од 500 до 10.000 евра за агресија или насилство врз училишниот персонал.
Министерот за образование Џузепе Валдитара изјави: „Реформата на оценките за владеење ја враќа важноста на индивидуалната одговорност, го става почитувањето на луѓето и јавните добра во фокусот и го враќа авторитетот на наставниците“.
Новата мерка беше поддржана од Италијанската асоцијација на директори на училишта (АНП). Тие бележат зголемување од 110 отсто на бројот на агресивни напади врз наставниот кадар од почетокот на оваа година во однос на лани. Како што објави АНП, учениците често се судираат со професорите поради употребата на мобилни телефони на часовите. Во многу случаи на наставниците им била потребна лекарска помош, а понекогаш и родителите на учениците биле сторители на нападите.
