М-р Нермин Теловска: Пелтечењето може длабоко да го афектира секој дел од животот

Лицата што пелтечат најчесто имаат проблем да се претстават, да ја кажат адресата, да одговорат на телефонски повик, да нарачаат храна, да побараат карта или влезница или да направат нешто друго кога се побарува говор. Многумина од нив се свесни за нестрпливоста на слушателот и за непријатноста додека ги чека да се искажат. Секако, ова предизвикува чувство на притисок во ситуацијата и доведува до влошување на пелтечењето

Пелтечењето претставува нарушување на вербалната комуникација: М-р Нермин Теловска, логопед - специјалист за дисфлуентни нарушувања на говорот

ПИШУВА:
М-р Нермин Теловска,
логопед – специјалист за дисфлуентни нарушувања на говорот
ЈЗУ Завод за рехабилитација на слух, говор и глас – Скопје

Пелтечењето e проблем на организацијата и синхронизацијата на моторната активност на мускулните групи кои го извршуваат моторното дејство при обликувањето на гласовите и модулацијата на говорниот израз

♦ ♦ ♦ ♦ ♦ ♦ ♦

Иако многумина кои пелтечат, тоа не ги спречило да станат врвни уметници,
спортисти, политичари или банкари, сепак, пелтечењето може да биде голем проблем во животот. За пелтечењето кое претставува нарушување на вербалната комуникација, постои долг историски интерес и најразлични шпекулации за неговата етиологија и третман, но сè уште е мистериозно и конфузно. Тешкотиите во дефинирањето на овој ентитет произлегуваат од различните аспекти на видување на проблематиката, како и од различните форми на неговото манифестирање.

Пелтечењето e проблем на организацијата и синхронизацијата на моторната активност на мускулните групи кои го извршуваат моторното дејство при обликувањето на гласовите и модулацијата на говорниот израз. До пелтечење доаѓа кога текот на зборовите е прекинат со двоумење, застанување, репетиции или пролонгации на гласовите. Флуентноста е прекината со спазам и абнормалности во фонацијата и во дишењето. Се состои од моменти на говорни прекини со такви зачестености и абнормалности кои го привлекуваат вниманието, интерферираат со комуникацијата и доведуваат до неприспособеност.

Високото ниво на анксиозност го афектира животот на лицата со пелтечење, го нарушува квалитетот на живеење, нивниот однос кон секојдневната комуникација и им ја намалува самодовербата. Од ваквата комплексна природа на пелтечењето произлегува потребата за подигнување на свесноста кај луѓето за значењето и тежината на овој проблем, како и третман од квалитетен, високо остручен кадар

Пелтечењето може длабоко да го афектира секој дел од животот. Лицата што пелтечат
најчесто имаат проблем да се претстават, да ја кажат адресата, да одговорат на телефонски повик, да нарачаат храна, да побараат карта или влезница или да направат нешто друго кога се побарува говор. Многумина од нив се свесни за нестрпливоста на слушателот и за непријатноста додека ги чека да се искажат. Секако, ова предизвикува чувство на притисок во ситуацијата и доведува до влошување на пелтечењето. Кога некој му го завршува зборот или реченицата на лицето што пелтечи, може да дојде до погрешна формулација на пораката, до уште поголем стрес и појава на негативни емоции, што доведува до инхибиција од социјални ситуации и го попречува живеењето комплетен социјален живот.

За пелтечењето кое претставува нарушување на вербалната комуникација, постои долг историски интерес и најразлични шпекулации за неговата етиологија и третман, но сè уште е мистериозно и конфузно

Пелтечењето доведува до развој на негативни емоции како: анксиозност, страв, срам, чувство на вина. Високото ниво на анксиозност го афектира животот на лицата со пелтечење, го нарушува квалитетот на живеење, нивниот однос кон секојдневната комуникација и им ја намалува самодовербата. Од ваквата комплексна природа на пелтечењето произлегува потребата за подигнување на свесноста кај луѓето за значењето и тежината на овој проблем, како и третман од квалитетен, високо остручен кадар.

22 Октомври е денот кој се одбележува со цел да се подигне јавната свест за овој комплексен проблем, кој успешно се третира во ЈЗУ „Завод за рехабилитација на слух, говор и глас“ во Скопје, каде што се доаѓа на закажан термин од страна на матичниот лекар.