Претходни студии покажаа дека болеста КОВИД-19 често е потешка кај мажите отколку кај жените, а новите податоци укажуваат дека мултисистемскиот воспалителен синдром кај децата (MIS-C), компликација од КОВИД-19 кај децата, почесто се јавува кај машките деца. Исто така, се покажало и дека поголем процент од машките деца заболени од мултисистемскиот воспалителен синдром кој е поврзан со КОВИД-19, завршуваат со смртен исход.
Од почетокот на пандемијата со новиот коронавирус SARS-CoV-2, здравствените работници повеќе се фокусираа на спречување на инфекцијата кај високо ризичните групи на луѓе, вклучувајќи ги повозрасните лица и лицата со пропратни болести, како висок притисок, дијабетес, кардиоваскуларни болести и дебелина.
Како пандемијата еволуираше, забележани се компликации од КОВИД-19 кај децата, а една од најзагрижувачките е мултисистемскиот воспалителен синром. Болеста е сериозна состојба во која некои органи и ткива, како срце, крвни садови, бели дробови, бубрези, мозок, кожа, очи или дигестивен систем, сериозно се воспалуваат.
Знаците и симптоми на мултисистемскиот воспалителен синдром вклучуваат осип, крвави очи, отечени раце и стапала, испукани усни, отечен и црвенкаст јазик, зголемени лимфни јазли, висока температура, низок крвен притисок, многу висок пулс, пролив, повраќање и респираторни симптоми поради КОВИД-19.
Ова истражување, објавено на medRxiv покажало дека мултисистемскиот воспалителен синдром се појавил кај 8,9 проценти од машките деца заболени од КОВИД-19 и кај пет проценти од женските деца. Исто така, ризикот од смрт од овој синдром бил поголем кај машките деца, 1,2 проценти наспроти 0,4 проценти.
Се смета дека синергијата помежу витаминот Д3 и естрогенот, женски полов хормон, може да влијае на половите разлики во исходот кај болните од КОВИД-19, како и активноста и експресијата на АСЕ2.
