♦♦♦♦♦♦♦
Како што се повеќе се шири во светот пандемијата на „Ковид-19“, здравствените власти ги предупредуваат граѓаните да се придржуваат до мерките на претпазливост – редовно да ги мијат рацете, да избегнуваат непотребни патувања, да се обидат да работат од дома и слично. Но, што е со бремените жени? Дали има посебни, дополнителни мерки за нив и дали спаѓаат во ранливата група, како што се оние над 60 години или оние со ослабен имунитет?
За жал, со оглед на тоа што вирусот се појави само пред неколку месеци, бројот на студии што го испитувале влијанието на „Ковид-19“ врз бремените жени и нивните неродени деца е прилично оскуден. Сепак, прелиминарните студии и извештаи укажуваат на тоа дека коронавирусот нема посебно да им наштети на бремените жени или на нивните бебиња.
Во моментов не постојат докази дека има зголемен ризик од спонтан абортус доколку трудницата се зарази со Ковид-19, велат експертите
Една од причините за загриженост е тоа што во бременоста жените почесто заболуваат од грип. Ова е делумно поради тоа што бременоста го ослабува имунолошкиот систем. Исто така, фетусот и матката можат во последните месеци од бременоста да ги притиснат другите органи, вклучувајќи ги и белите дробови. Резултатот на тоа е дека во некои делови на белите дробови доаѓа до послаба циркулација на воздухот, што го прави органот поподложен на инфекција, пишува магазинот „New Scientist“.
Воспалителните процеси, исто така, можат да му наштетат на фетусот. На пример, долготрајната висока температура за време на бременоста, особено во првиот триместар, е поврзана со некои оштетувања на плодот.
„Која било вирусна инфекција за време на бременоста го става фетусот во ризик од спонтан абортус, раѓање на мртво бебе или некои деформации“, објаснува гинекологот Дејвид Бауд од Lausanne University Hospital во Швајцарија.
Постојат индикации дека бремените жени се изложени на поголем ризик од потешки симптоми доколку се заразат со вирусите на MERS и SARS, кои се многу слични на новиoт сој на коронавирус, и дека овие инфекции исто така го зголемуваат ризикот од спонтан абортус. Но, и тие информации треба да се земаат со доза на резерва, бидејќи многу малку бремени жени се пријавени за заразени со овие вируси, а околу една четвртина од нив имале спонтан абортус.
На бремените жени им се советува да ги преземат сите мерки на претпазливост за да се заштитат од разболување, како што е избегнување на гужви и често миење на рацете
Во студијата која деновиве ја објави Јалан Лиу од Huazhong University of Science and Technology во Кина и нејзините колеги, биле разгледувани четири жени кои биле заразени со коронавирус кога ги родиле своите бебиња. Се покажало дека сите четири бебиња биле родени здрави без каков било симптом на Covid-19.
Едно бебе имало поблаги проблеми со дишењето, но закрепнало добро после неколку дена лекување. Две бебиња имале осип, но тој исчезнал во рок од десет дена без лекување. Трите бебиња биле тестирани за „Ковид-19“ и ниту едно од нив не било позитивно или заразено со вирусот.
Друга студија, во која биле вклучени девет жени кои родиле 10 бебиња, открива дека едно дете починало, а девет преживеале. Ниту едно бебе не било позитивно на коронавирус, но шест се родиле со недостаток на воздух, а две имале покачена телесна температура.
„Другите истражувања се поохрабрувачки“, вели Пат О’ Брајан, потпретседател на Кралскиот колеџ на акушери и гинеколози (RCOG) во Велика Британија. Во едно од нив биле следени 15 жени кои за време на бременоста биле заразени со новиот коронавирус, а се покажало дека тие немале посериозни симптоми отколку жените кои не биле бремени. „Во оваа студија бремените жени добро закрепнаа без употреба на антивирусни лекови“, напишаа авторите.
„Во моментов не постојат докази дека има зголемен ризик од спонтан абортус доколку трудницата се зарази со Ковид-19“, вели О’ Брајан.
Како и да е, научниците во овој момент се уште имаат малку информации за новиот коронавирус. Во меѓувреме на бремените жени им се препорачува да ги преземат сите мерки на претпазливост за да се заштитат од разболување, како што е избегнување на гужви и често миење на рацете.
