Нормално е детето понекогаш да се исплаши од некој необичен симптом, како е гласна кашлица, повраќање или необичен осип по телото. Сепак, некои деца се преоптоварени со реакциите на своето тело и ги воочуваат и најситните симптоми и панично се плашат од болести. Лекарите предупредуваат на повторувачки знаци кои може да бидат алармантни и да укажуваат на хипохондрија кај вашето дете.
Детето често вели дека нешто не е во ред со неговото тело
Хипохондријата кај децата се манифестира на сличен начин како и кај возрасните. Се карактеризира со опсесивна преокупација со потрагата по симптоми. Ако вашето дете често бара да му измерите температурата, сака да оди на лекар или на најмала кашлица панично реагира, мислејќи дека е многу болно, можно е да се соочува со хипохондрија. Знак на тревога може да биде опседнатоста на детето со здравјето и фиксирањето на туѓите здравствени проблеми, како и страв дека некој ќе го зарази.
Неодамна доживеало стресна ситуација
Болест или смрт во семејството може да предизвика анксиозен однос кон здравјето. Детето можеби не успеало да ги среди емоциите поради се што се случило, така што ова е начинот на кој телото се справува со товарот. Глобалната пандемија, мерките и постојаната изложеност на здравствени теми, значително влијаеше на развојот на хипохондријата кај децата.
Бурно реагира и на најмали симптоми
Хипохондрично дете од благо црвенило на колената ќе создаде дијагноза за сериозна алергија во својата глава. Ако почувствува силна глад, веројатно ќе коментира како му се повраќа, а не колку е гладно. Доколку забележите дека детето ги преувеличува своите состојби и симптоми, можно е да е хипохондрик.
Тежнее кон анксиозно однесување
Децата кои се склони кон грижа и анксиозно однесување имаат поголема веројатност да станат хипохондрици бидејќи здравјето е само уште една од многуте работи што ги загрижува. Когнитивната бихејвиорална терапија може да му помогне на детето да се справи со својата анксиозност, како и различни техники за релаксација. Детската анксиозност треба да се сфати сериозно.
И вие сте склони кон хипохондрија
Една студија спроведена во Данска покажала дека постои мала корелација помеѓу хипохондријата кај мајките и нивните деца, што значи дека таа не се пренесува директно. Сепак, мајките склони кон хипохондрија можат да им ги пренесат своите обрасци на децата така што нивните симптоми и болести ќе ги доживуваат посериозни отколку што навистина се.
