Од утре на сила новите рестриктивни мерки: Забрането е групирање по плоштади за дочек и прослава на Новата година како и секаков вид на собири во периодот на празниците

Рестораните ќе работат до 18 часот, забранети се собири по плоштадите и работните организации

Новиот пакет мерки кој ќе важи до 21 јануари, има за цел да избегне зголемување на бројот на заболени од COVID-19 во престојниот период на празници
„Апелираме и препорачуваме да нема домашни собири за празниците. Да празнуваме одговорно заради сите нас“, порача министерот за здравство д-р Венко Филипче

Од утре стапува на сила новиот пакет на рестриктивни мерки кои ги усвои Владата на предлог на Комисијата за заразни болести. Новиот пакет мерки кој ќе важи до 21 јануари, има за цел да избегне зголемување на бројот на заболени од COVID-19 во престојниот период на празници, информираат од Министерството за здравство.

Со новите мерки е предвидена реорганизација на работното време на угостителите и тие од утре ќе затвораат во 18 часот, наместо до 21 часот како што беше до сега. На сила останува забраната за собири на јавни места и се апелира до единиците за локална самоуправа да го засилат надзорот за почитување и спроведување на оваа мерка.

Угостителите од утре ќе затвораат во 18 часот, наместо до 21 часот како што беше до сега

Забрането е групирање по плоштади за дочек и прослава на Новата година како и секаков вид на собири во периодот на празниците, а хотелите ќе треба да ги затворат своите ресторани по 21 часот. Забрана за собири на отворено и ограничен број посетители во затворен простор со задолжително носење на маски ќе важи и за празнување на верските празници кои следат.

„Апелираме и препорачуваме да нема домашни собири за празниците. Да празнуваме одговорно заради сите нас“, порача министерот за здравство д-р Венко Филипче.