ОВАА НАВИКА МОЖЕ ДА ВЛИЈАЕ НА ПОЈАВАТА НА ГЕСТАЦИСКИ ДИЈАБЕТЕС: Експертите ги предупредуваат трудниците што да не прават пред спиење

Ново истражување покажало дека најчестата компликација во бременоста може да биде резултат на лоши навики за кои не сме свесни.

Американските истражувачи откриле дека бремените жени кои се повеќе изложени на екран пред спиење имаат поголема веројатност да развијат гестациски дијабетес.Главната авторка на студијата, д-р Миње Ким, објаснува дека изложувањето на светлина во текот на ноќта го намалува: нивото на хормонот мелатонин, го нарушува внатрешниот часовник на телото и влијае на регулирање на нивото на шеќер во крвта.

Гестацискиот дијабетес (дијабетес во бременост) се манифестира како намалена толеранција на гликоза, а најчесто се јавува помеѓу 24-28 недела од бременоста. Исчезнува по породувањето, кога хормоните се враќаат на нормално ниво (обично 6 недели по породувањето). Оваа состојба погодува најмалку четири до пет од 100 жени во текот на бременоста, а доколку не се лекува може да предизвика несакани последици за бебето, но и за мајката.

Имено, доколку гестацискиот дијабетес не се контролира доволно добро, може да доведе до сериозни здравствени проблеми на бебето, вклучително и смрт. Авторите на споменатата студија ги следеле податоците на повеќе од 700 трудници за да видат како изложувањето на светлина пред спиење влијае на нивното здравје. Иако само мал број жени развиле гестациски дијабетес, резултатите откриле дека врската навистина постои.

Како што објаснуваат во извештајот, бремените жени кои биле изложени на силна светлина во својот дом, без разлика дали се работи за телевизор, компјутер или паметен телефон, имале пет пати поголеми шанси да ја развијат оваа честа компликација.