Храната подготвена на скара може да биде безбеден и вкусен оброк за време на бременоста, но клучно е месото и рибата што се консумираат да бидат целосно термички обработени. Со темелното печење се уништуваат микробите што може да бидат присутни во суровата храна. Ако месото и рибата останат недоволно печени, во нив може да се развијат штетни бактерии или паразити кои предизвикуваат труење со храна, пишува Baby Centre.
Скриени ризици на чинијата што не треба да се потценат
Имунолошкиот систем во бременоста е насочен кон заштита на детето, поради што бремените жени се поподложни на инфекции, вклучително и труење со храна. Ако постои сомнеж за труење со храна, важно е да се јавите кај лекар.
Труењето предизвикано од бактерии како салмонела, E. coli или кампилобактер најчесто нема директно да му наштети на бебето, но кај мајката може да предизвика непријатни симптоми како дијареја, повраќање и болки во стомакот. Од друга страна, токсоплазмозата, иако ретка, претставува сериозен ризик. Ја предизвикува паразит кој може да се наоѓа во сурово или недоволно печено месо, најчесто свинско и јагнешко.
Токсоплазмозата кај бремената жена може да помине без симптоми или да се манифестира како блага болест слична на грип. Меѓутоа, за бебето може да биде опасна и во ретки случаи да доведе до спонтан абортус или губење на бебето при породување. Со правилна подготовка на храната и добра хигиена, овие ризици може да се избегнат.
Лекар предупредува на две клучни грешки што многумина ги прават
Д-р Ден Нејдом истакнува дека бремените жени можат да уживаат во скарата, но со придржување кон основните правила за безбедност.
Тој нагласува дека е најважно да се избегнува сурово и недоволно печено месо. Сета храна што ја јадат бремените жени мора да биде целосно испечена. Исто така, предупредува дека сите, не само бремените, треба да избегнуваат загорено месо бидејќи содржи штетни материи кои можат да го зголемат ризикот од развој на болести.
Труењето предизвикано од бактерии како салмонела, E. coli или кампилобактер најчесто нема директно да му наштети на бебето, но кај мајката може да предизвика непријатни симптоми како дијареја, повраќање и болки во стомакот. Од друга страна, токсоплазмозата, иако ретка, претставува сериозен ризик. Ја предизвикува паразит кој може да се наоѓа во сурово или недоволно печено месо, најчесто свинско и јагнешко
Особено ја истакнува важноста на хигиената: суровото месо треба да се чува одвоено од готовата храна, да се користат посебни чинии и прибор, а рацете да се мијат темелно и често, исто толку внимателно како во медицинска средина.
Едноставни правила што прават разлика
За да може да се ужива во храната од скара без грижа, важно е да се придржувате до неколку едноставни правила.
Суровото месо и рибата треба да се чуваат покриени во фрижидер, одвоено од другите намирници за соковите да не дојдат во контакт со друга храна. Од фрижидер треба да се извадат непосредно пред печење и да не се оставаат на сонце. Замрзнатата храна треба целосно да се одмрзне пред подготовката.
За време на подготовката треба да се користат одвоени даски, прибор и чинии за сурово месо и за готова храна како салати, печива или веќе испечено месо. Рацете треба темелно да се измијат со сапун и топла вода по секој контакт со сурово месо или риба.
Печењето треба да започне дури кога пламенот ќе се смири, а јагленот ќе стане жар црвен и покриен со пепел. Храната треба редовно да се превртува и да се внимава суровите парчиња да не доаѓаат во контакт со веќе испечените.
Ако месото и рибата останат недоволно печени, во нив може да се развијат штетни бактерии или паразити кои предизвикуваат труење со храна
Месото мора да биде целосно испечено, жешко во средината и без розеви делови. Соковите што излегуваат треба да бидат бистри. Рибата е готова кога ќе стане непроѕирна и ќе почне да се листа. Школките треба да се печат додека не се отворат, а оние што ќе останат затворени треба да се фрлат. Важно е да не се потпирате на изгледот однадвор, бидејќи загорената површина не значи дека внатрешноста е доволно печена.
Маринадата во која стоело сурово месо не треба да се користи за веќе испечена храна. Храната е најдобро да се изеде веднаш по подготовката, а остатоците да се чуваат во фрижидер или да се фрлат ако постои сомнеж во нивната исправност.
Со овие мерки на претпазливост, скарата може да остане пријатен и безбеден дел од првомајскиот ручек и летните оброци и за време на бременоста.
