Септември не го обележува само враќањето во училишните клупи, туку значи и почеток на различни вонучилишни активности за децата. Активностите се рекламираат на сите страни, а тоа создава стрес кај некои родители бидејќи можеби не можат да си дозволат активности, немаат време да го возат детето или нивните дополнителни обврски го нарушуваат неделниот ритам, кој и онака е забрзан. Детскиот психолог Џилијан Робертс објаснува зошто е во ред детето да не оди на дополнителни активности и како можете бесплатно да ги надоместите и тогаш кога вам ви одговара.
Балансиран семеен ритам
Родителите кои се чувствуваат виновни што нивното дете не оди на балет, виолина, фудбал или пливање и кои се чувствуваат како да ги изневериле своите деца, д-р Робертс ги советува да бидат благи кон себе и да не се осудуваат.
Иако вонучилишните активности се важни за децата бидејќи им помагаат во нивниот личен развој и ги запознаваат со сопствените таленти и интереси, не е крајот на светот доколку децата не одат на една или повеќе активности секоја година.
На децата им е многу поважно нивното семејство да има избалансиран неделен ритам кој е одржлив и за нивните родители и за нив. Ако родителите се под постојан стрес затоа што постојано мораат да ги развозуваат некаде своите деца, тогаш тоа не е најдобрата опција за семејството.
Алтернативни активности
Постојат и други начини како родителите можат да обезбедат интересни и едукативни активности за децата, без тие да бидат врзани за строг распоред.
Некои алтернативни редовни вонучилишни активности може да бидат семејно одење на базен, прошетка во парк/планина или шума. Посетите на музеи и галерии можат да бидат интересни за децата, ако од тоа направите мал семеен ритуал. Дружењата во парк се секогаш добра можност да се наполните со енергија, како и посетите на библиотеките во соседството. Децата ќе уживаат на концерти и добротворни настани доколку вклучуваат содржини за возраста на вашите деца.
