Со години ја проучувал човечката психологија, а фасцинантните сознанија до кои дошол ги забележал во книгата „Емоционална интелигенција“ која е преведена на дури 40 светски јазици. Психологот и професор на Харвард, Даниел Големан, во неа истакнува дека во првиот контакт внатре во семејството откриваме што чувствуваме за себе и како другите реагираат на нашите чувства, на кој начин треба да се однесуваме кон другите, учиме како да изразуваме надежи и стравови… Во исто време, тој напоменува дека некои родители се талентирани учители, додека други погубно им одмогнуваат на нивните деца.
На прашањето како правилно да се подигне емоционално интелигентно дете, тој вели:
„Повеќето родители се природно добри учители“. Сепак, важно е да се каже дека на детето уште од најмала возраст треба да му се објасни како другите луѓе се чувствуваат кога тоа нешто ќе направи – ова е една од најважните лекции за емоционално „описменување“ на детето. Добрите родители ја користат секоја можност кога детето е вознемирено да изреагираат како добри емоционални учители. Тие сериозно ги сфаќаат чувствата на нивните деца и секогаш се обидуваат да разберат што ги повредило или вознемирило. Трите најчести погрешни обрасци во воспитувањето се: целосно занемарување на детските чувства, преголема попустливост на детските барања и презирен однос кон детските чувства“.
