Луѓето кои прележале Ковид-19 во изминатата година се предупредени од лекарите да бараат знаци на нови потенцијални несакани ефекти. Најновата студија покажала дека оние кои се бореле со инфекцијата се изложени на поголем ризик од опасна по живот состојба која веќе погодува пет милиони Британци.
Потребен е строг надзор бидејќи без него високиот шеќер во крвта може да предизвика оштетување на органите, очите и екстремитетите и да доведе до срцев и мозочен удар
Дијабетес како последица
Оние кои прележале Ковид-19 имале 46 отсто поголема веројатност да развијат дијабетес тип 2 за прв пат една година по позитивниот тест на вирусот. Откритието важи дури и за оние луѓе кои имале лесни симптоми или воопшто немале симптоми на болеста. Меѓутоа, оние кои се бореле со потешка форма на болеста биле најзагрозени, објави MSN.
Дијабетес тип 2 е кога телото не може правилно да го прeработи шеќерот од храната. Потребен е строг надзор бидејќи без него високиот шеќер во крвта може да предизвика оштетување на органите, очите и екстремитетите и да доведе до срцев и мозочен удар.
Оваа сериозна состојба е веќе во пораст поради зголемениот број на лица со прекумерна телесна тежина.
Истражување на научниците
Зијад Ал-Али, раководител на истражувања и развој во VA St. Louis Health Care System, кој ја предводеше студијата, рече: „За пошироката јавност, ако сте имале Ковид-19, треба да обрнете внимание на шеќерот во крвта“.
Иако истражувањето било спроведено првенствено на белци, постари мажи, големиот број луѓе кои биле дел од истражувањето го убедија г-дин Ал-Али дека неговите наоди се применливи за јавноста. Тој и неговиот тим ги споредиле здравствените досиеја на повеќе од 181.000 луѓе дијагностицирани со Ковид, со 4,1 милиони луѓе кои немале Ковид-19.
Студијата, објавена во „Lancet Diabetes & Endocrinology“, вели: „Тековните докази што ги добивме сугерираат дека дијабетесот е аспект на повеќекратниот долг Ковид синдром“. Потоа додале: „Стратегиите за пост-акутна грижа за луѓето со Ковид-19 би требало да вклучуваат откривање и третман на дијабетес“.
И голем број помали студии покажале можност за појава на дијабетес како последица на Ковид. Минатата недела, една германска студија покажа дека луѓето кои прележале Ковид имаат 28 отсто поголеми шанси да развијат дијабетес тип 2. Студијата опфатила 35.865 луѓе кои биле позитивни на коронавирус.
Д-р Феј Рајли од „Дијабетес УК“ рече: „Оваа студија, како и другите, сугерира дека коронавирусот би можел да предизвика дијабетес тип 2, но сè уште не е јасно дали вирусот предизвикува нови случаи на дијабетес тип 2, дали открива недијагностицирани случаи или привремено го зголемува нивото на шеќер во крвта.“
Оние кои прележале Ковид-19 имале 46 отсто поголема веројатност да развијат дијабетес тип 2 за прв пат една година по позитивниот тест на вирусот. Откритието важи дури и за оние луѓе кои имале лесни симптоми или воопшто немале симптоми на болеста. Меѓутоа, оние кои се бореле со потешка форма на болеста биле најзагрозени
Дали сте во опасност?
Дијабетесот тип 2 може да остане неоткриен некое време бидејќи симптомите често се отсутни. Еве дел од нив:
- Мокрите повеќе од вообичаено, особено навечер
- Постојано сте жедни
- Многу сте уморни
- Сте изгубиле тежина без да сакате
- Имате чешање околу гениталиите
- Сте добиле исеченици или рани на кои им е потребно долго време да зараснат
- Имате заматен вид
Други поретки знаци се:
- Темни дамки на кожата
- Чести инфекции
- Чешање на кожата
- Сува уста
- Раздразливост
- Сладок здив
- Пецкање или вкочанетост
- Лоши заби
Ако имате роднина со дијабетес, имате прекумерна тежина, поголема е веројатноста за ваква дијагноза. Истото важи и за луѓето над 40 години.
Но, и децата може да го добијат, а се проценува дека се загрозени 36.000 деца во Обединетото Кралство, и постои загриженост поради зголемување на дијабетесот кај децата по инфекцијата со коронавирус.
Претходно оваа година, американските научници испитуваа база на податоци што открија дека децата кои биле заразени со Ковид имаат 31 отсто поголеми шанси да бидат дијагностицирани со дијабетес отколку оние што го избегнале вирусот, пишува „The Sun“.
