Грижата децата редовно да ги мијат забите е важна од многу повеќе причини отколку само спречување на кариес. Родителите секојдневно се соочуваат со нездрави навики кај децата, но ново истражување предупредува на уште една која може да му наштети и на физичкото и на менталното здравје – занемарување на оралната хигиена. Националното истражување на Детската болница Мот во САД покажало дека повеќе од една третина од децата имаат проблеми со забите, што експертите го поврзуваат со недоволна грижа за оралното здравје.
Најчести проблеми со оралното здравје кај децата
Истражувачите анкетирале 1801 родител на деца на возраст од 4 до 17 години за нивните навики и оралното здравје. Резултатите покажале дека повеќе од 36% од родителите изјавиле дека нивното дете во последните две години имало проблеми со забите, вклучувајќи кариес (29%), промена на бојата на забите (7%), болка или чувствителност (6%) и проблеми со непцата (3%).
Податоците покажуваат и дека само три од пет деца редовно ги мијат забите двапати дневно, при што момчињата заостануваат зад девојчињата во оваа навика и во користењето забен конец. Проблемите се поизразени кај децата со послаба хигиена.
Дури 44% од родителите чии деца практикуваат орална хигиена еднаш дневно или поретко пријавуваат проблеми со забите, во споредба со 31% кај децата кои тоа го прават два до три пати дневно. Повеќе од една третина од родителите забележале лош здив кај своето дете, но најчесто тоа го припишуваат на „утрински здив“, наместо на недоволно миење заби.
Како оралната хигиена влијае врз целокупното здравје
Кога оралната хигиена е занемарена, се отвора пат за низа здравствени проблеми. Тоа се и најчестите причини поради кои децата одат на стоматолог.
„Кариесот е на прво место, а потоа следуваат гингивитис, ерозија на глеѓта и нарушување на микробиомот, што може да се манифестира како хроничен лош здив, повторлив кариес дури и кај деца што ги мијат забите, како и рани заболувања на непцата“, објаснува д-р Ками Хос, стоматолог.
Уште позагрижувачки се ефектите врз менталното здравје, иако тие потешко се забележуваат.
Врската меѓу оралното и менталното здравје
Истражување објавено во списанието American Journal of Orthodontics покажало дека забите се физичка карактеристика која најчесто е причина за задевање меѓу врсниците. Децата кои биле изложени на вакво однесување имаат пониска самодоверба и поголема одбивност кон училиштето.
Болката поврзана со проблемите со забите исто така може да предизвика емоционални и социјални тешкотии. „Дете со нелекуван кариес може секојдневно да живее со болка, да не може да се концентрира и да биде раздразливо“, вели д-р Хос, додавајќи дека понекогаш ваквите состојби погрешно се толкуваат како проблеми во однесувањето.
Зошто лошото орално здравје денес е поголем ризик
Иако родителите денес се поинформирани, децата се соочуваат со нови предизвици. Поголемата консумација на преработена храна, честото грицкање и киселите пијалаци го зголемуваат ризикот од кариес и оштетување на глеѓта.
Во исто време, влијанието на социјалните мрежи ги засилува и психолошките последици. „Децата стануваат свесни за својот изглед сè порано“, вели д-р Хос. „Имам пациенти од осум години кои прашуваат за избелување на забите.“
Овој тренд доведува до појава што експертите ја нарекуваат „анксиозност поради насмевката“, каде дури и деца со здрави заби чувствуваат несигурност затоа што не изгледаат како на филтрираните фотографии на интернет.
На крајот, пораката е јасна: редовната орална хигиена не е важна само за здрави заби, туку и за целокупната благосостојба и самодоверба на детето.
