Ако сте родител кој пуши – слободно може да ве гризе совеста. Дури и ако самите не сте пушач, честата изложеност на тутунски чад може да биде причина за болест и смрт. Пасивното пушење годишно убива 3.000 луѓе кои заболуваат од рак на белите дробови, иако никогаш не запалиле цигара, и десетици илјади поради срцеви заболувања, само во САД, каде што е и спроведено ова истражување.
А зошто пишуваме за ова? Затоа што кај нас, сè уште, не постои доволна свест за тоа колку голема штета им нанесуваме на децата изложувајќи ги на тутунски чад – за време на бременоста, но и откако ќе се родат.
Многу мајки ќе кажат дека пушеле во текот на целата бременост и дека детето им се родило здраво и добило оценка 10. Добро е што е така, но две работи не смееме да заборавиме. Првата е дека многу тешко која било мајка која добила дете со здравствен проблем затоа што пушела во бременоста, тоа јавно ќе го каже. Втората е уште поважна – тоа што детето се родило потполно здраво и расте опкружено со тутунски чад не значи дека последиците од тоа нема да го стигнат кога малку ќе порасне.
Децата на пушачите почесто и повеќе кашлаат и им треба повеќе време да ја пребродат настинката. Истражувањата покажаа дека поради тоа и повеќе отсуствуваат од училиште во однос на децата на непушачите
Милиони деца се пасивни пушачи. Секој ден. Во своите домови, во рестораните, кафулињата, кога одат на гости. Едно истражување покажало, вели пулмологот д-р Драгана Јовановиќ, дека ако некој пред вас испуши десет цигари, тоа е како вие да сте испушиле четири. Кога станува збор за децата, ситуацијата е уште полоша бидејќи тие дишат побрзо, па вдишуваат поголема количина тутунски чад, а со него и сите штетни материи. Нивните бели дробови сè уште се развиваат, па изложеноста на тутунски чад е директно загрозување на здравиот развој.
Накратко, пушачи, им штетите на своите деца. Дури и ако не пушите во домот. Студиите јасно покажаа дека последици од пасивното пушење постојат и кај децата чии родители се пушачи, дури и ако тие не пушат во домот. Тоа значи дека единствениот начин да не го загрозите здравјето на своите деца со вашите лоши навики е – да го оставите тутунот. Не да не пушите додека децата се тука. Ниту, пак, да пушите на терасата.
Што е пасивно пушење?
Тоа речиси сигурно го знаете. На пасивно пушење се изложени непушачите (но и пушачите) кои вдишуваат чад од цигари или тутун од луле, кој содржи околу 4.000 различни видови хемикалии. Многу од нив се опасни, а за најмалку 50 е потврдено дека се причина за канцер. Секојпат кога се во просторија во која има тутунски чад, незрелите бели дробови на детето се изложени на овие хемикалии. И пред да кажете дека така било и кога ние бевме деца, вратете се на почетокот на текстот, каде што ќе видите дека една од последиците се срцевите заболувања. Оние кои се водечка причина за смрт во регионот.
Кај нас сè уште не постои доволна свест за тоа колку голема штета им нанесуваме на децата изложувајќи ги на тутунски чад – за време на бременоста, но и откако ќе се родат
Но, Американската академија на педијатри отиде чекор понатаму и ги истражи последиците од нешто што го нарекоа thirdhand smoke (пушење од трета рака) и утврдено е дека овој вид изложеност на хемикалии е штетен за децата. Тоа е всушност изложеност на остатоците од тутунскиот чад, дури и кога во просторијата во која престојуваме во тој момент никој не пуши. Тоа се остатоци кои можат да се најдат во ѕидовите, мебелот, седиштата во автомобилот, па дури и во детската коса.
Пушење во бременоста
Ако сте од оние на кои докторот им советувал да не го оставаат пушењето бидејќи тоа е голем стрес во бременоста, тоа секако може да биде згоден изговор. Но, тоа е совет да прекинете полека, а никако да продолжите со по неколку цигари на ден. Бидејќи пушењето во бременоста носи повеќекратни ризици од:
- спонтан абортус,
- предвремено породување,
- помала тежина на детето при раѓање (што може да значи и дека бебето има здравствен проблем),
- ненадејна смрт на новороденчето (SIDS),
- проблеми во учењето и нарушување на вниманието и хиперактивност (ADHD).
Колку повеќе и колку подолго трудницата пуши или е изложена на тутунски чад, толку ризикот е поголем. Кога и да прекинете во текот на бременоста, на вашето бебе сте му направиле огромна услуга.
Како пасивното пушење влијае врз здравјето на децата
Покрај поголемиот ризик од СИДС и сериозни здравствени проблеми, децата изложени на тутунски чад имаат зголемен ризик од:
- инфекции на увото,
- почести настинки и кашлица,
- респираторни проблеми,
- проблеми со забите.
Децата на пушачите почесто и повеќе кашлаат и им треба повеќе време да ја пребродат настинката. Истражувањата покажаа дека поради тоа и повеќе отсуствуваат од училиште во однос на децата на непушачите.
Пушачи, им штетите на своите деца. Дури и ако не пушите во домот. Студиите јасно покажаа дека последици од пасивното пушење постојат и кај децата чии родители се пушачи, па дури и ако тие не пушат во домот. Тоа значи дека единствениот начин да не го загрозите здравјето на своите деца со вашите лоши навики е – да го оставите тутунот. Не да не пушите додека децата се тука. Ниту пак да пушите на терасата
Долгорочни ефекти од пасивното пушење
Децата кои растат со родители пушачи имаат поголема шанса и самите да станат зависни од цигари. А дури и ако тоа не се случи, доколку растеле како пасивни пушачи, им ја зголемувате шансата подоцна во животот да имаат здравствени проблеми како:
- непотполн развој на белите дробови,
- рак на белите дробови,
- болести на срцето,
- катаракта.
Затоа, ако сте пушач и родител, не барајте изговори.
„Лекарот рече дека во бременоста не смеам да ги оставам цигарите“ не е добар изговор. „И моите родители пушеа пред мене и немам здравствен проблем“ не е добар изговор. „Пушев цела бременост и родив здраво бебе“, исто така, не е добар изговор.
Бидејќи добар изговор да пушите во бременоста или во куќата во која има дете – не постои. (Зелена учионица)
