ПИШУВА:
Прим. д-р Љиљана Којиќ
педијатар
♦♦♦♦♦♦♦
Повод да го напишам овој текст е се поголемиот број на родители, кои буквално распаметени од грижа, доаѓаат во мојата ординација со изолат на МРСА од нос, како случаен наод при самоиницијативно и непотребно вадење брис за обична настинка, или при рутинско скринирање за упис во градинка (или училиште) кај здраво дете
♦♦♦♦♦♦♦
МРСА ВО НОС КАЈ ЗДРАВО ДЕТЕ: ИМА ЛИ ПРОСТОР ЗА ПАНИКА?
НЕ. МРСАТА НЕ Е ЕБОЛА!
Во јавноста, а особено помеѓу родителите на мали и училишни деца е присутен страв од МРСА-инфекции. Ова е најверојатно последица на недоволна информираност, а особено по објавени информации во медиумите за тешки последици од оперирани болни, во болнички услови со отворени рани.
„Опасната „болничка бактерија“ МРСА излегла од болниците и „хара“ по нашата околина!“ – вака некако би гласел еден бомбастичен наслов на лажна вест, какви што се многу одомаќинети кај нас.
Дали е баш така?
Нормално дека не. МРСА е моја „стара познаничка“. Познанството трае околу 20 години. Работев на неа долго време и знам доста за неа во времето кога работев на Одделот за интензивно лекување, и морам да признам дека и на мене и на моите колеги умеела да ни зададе многу мака.
За неа на интернет ќе прочитате дека е „супербактерија“ и ќе се распаметите.
За носителството да премине во активна инфекција со МРСА, мора да има „влезно место“ на кожата или во носот. Влезното место е повредена кожа. Тоа може да се мали ранички или гребаници, расчешан убод од инсект, состојби како екцема, па дури и место на поставување на пирсинг
Она што поголемиот број луѓе не го знаат е дека одамна, веќе 15-тина години, ја има во нашата секојдневна околина. Добар дел од нас ја носи на својата кожа или во својот нос.
Затоа да почнеме од почеток: ШТО СЕ МРСА и ЗЛАТНА СТАФИЛОКОКА?
Златна стафилокока (Staphylococcus Aureus) е топчеста бактерија, која ја има во носот на еден од тројца луѓе на нашава планета. Тоа буквално значи дека 30% од светската популација ја има или на својата кожа или во носот. Значи, воопшто не е ретка, ниту пак, така опасна во вонболнички услови и кај луѓе што немаат повредена кожа, како влезна врата.
МРСА (Метицилин-резистентен златен стафилокок – Methicyllin Resistant Staphylococcus Aureus) е поотпорен вид на златниот стафилокок, и со самото тоа, е потежок за лекување.
МРСА инфекциите главно ги погодуваат луѓето кои лежат во болница. Тие можат да бидат сериозни, но главно се излечиви со антибиотици на кои МРСА е осетлива.
МРСА одамна не живее само во болниците. Таа е проширена и во комуналната средина.
Некои студии укажуваат дека МРСА на својата кожа или во својот нос ја има околу 30% од детската училишна и предучилишна популација во САД и мошне веројатно и во другите делови на светот, како, на пример кај нас, каде што не е испитувано.
Одбрана на едно дете од МРСА-инфекцијата е добро информиран родител. Затоа би било добро да го прочитате овој текст.
ОВА СЕ НАЈЧЕСТИТЕ ПРАШАЊА КОИ РОДИТЕЛИТЕ ГИ ПОСТАВУВААТ ЗА МРСА – ИНФЕКЦИЈАТА
» Како децата добиваат МРСА?
МРСА се шири со контакт кожа на кожа. Или со допирање предмети, кои се контаминирани со МРСА. Кога еднаш ќе дојде во контакт со детето, тоа или ќе стане здрав носител на МРСА или ќе добие активна инфекција.
НАЈГОЛЕМИОТ БРОЈ ДЕЦА, НОСИТЕЛИ НА МРСА, НЕ СЕ РАЗБОЛУВААТ. БАКТЕРИЈАТА ЕДНОСТАВНО ЖИВЕЕ ВО НИВНИТЕ НОСОВИ ИЛИ НА КОЖАТА.
Но, како што знаеме, децата умеат да ги чепкаат своите носиња (тој малечок детски „златен рудник“), а потоа да ги контаминираат играчките со така извалканите рачиња. Поголемите деца, кои се занимаваат со спорт, можат да ја шират МРСА-та преку контаминирана спортска опрема, ако ја делат и разменуваат.
» Како настанува МРСА инфекција?
За носителството да премине во активна инфекција со МРСА, мора да има „влезно место“ на кожата или во носот. Влезното место е повредена кожа. Тоа може да се мали ранички или гребаници, расчешан убод од инсект, состојби како екцема, па дури и место на поставување на пирсинг. Еднаш, кога кожата е „отворена“, односно оштетена, дури и мало количество бактерии може да влезе и да се размножува.
» Ако моето дете било изложено на МРСА, што треба да правам?
Ако вашето дете било изложено на друга личност со МРСА инфекција, шансите и тоа да добие инфекција се многу мали. Но, ако забележите гноење на раничка, мозолче, црвенило или оток, јавете се на Вашиот лекар.
» Имам МРСА. Колку сум заразен?
Зависи од тоа дали сте само колонизирани или имате активна инфекција со МРСА.
» Што значи да бидеш колонизиран со МРСА?
Тоа значи да ја имате во носот или на кожата, но да сте здрави. Тогаш сте само колонизирани и не сте болни од МРСА инфекција.
(продолжува)
ПОВЕЌЕ ОД ИСТИОТ АВТОР, ПРИМ. Д-Р ЉИЉАНА КОЈИЌ:
- Се менува сликата за тежината кај бебињата – БУЦМАСТО БЕБЕ (ПОВЕЌЕ) НЕ Е СИНОНИМ ЗА ЗДРАВЈЕ
- По навршени шест месеци бебето нема потреба од ноќен подој
- Температура од инфекција кај здраво дете не може да доведе до оштетување на мозокот
- УВБ зраците се главен виновник за настанок на рак на кожата
- ПРЕМАЛО Е И НЕМОЌНО – Ако бебето упорно плаче не се обидувајте да го дисциплинирате, туку понудете му утеха
- Интервју со прим. д-р Љиљана Којиќ: Предвремено родените деца растат малку побрзо од врсниците и ги стигнуваат
- Бебешката кожа е нежна, но не е чиста, затоа бебето треба да се бања секојдневно
- Нема среќно бебе ако мајката е несреќна и преморена
- Глад, престегната пелена, грчеви, никнување на запчиња, „скок во растењето“- причини за силен плач кај малите бебиња
- МОРБИЛИТЕ НЕ СТИВНУВААТ. Жени кои планираат бременост не би смееле да останат бремени 4 недели по примање на ММР вакцина
- Како да одбегнете амонијакален дерматит кај бебето
- РОДИТЕЛИТЕ ПРАШУВААТ, ПЕДИЈАТРИТЕ ОДГОВАРААТ… Тазе прележана варичела не е пречка за вакцинирање со ММР
- Oдбраната од инфекции скоро и да не постои кај предвремено родените деца
- Секогаш ставајте го бебето да спие на грб
- Што треба да знаете ако сте родители на предвремено родено бебе? (1)
- Не го споредувајте вашето прематурче со бебињата-врсници на вашите пријателки кои се термински зрели новороденчиња (2)
